تر ۲۰کلنو کم عمره د افغانستان فوټبال لوبډله به نن سېشنبه (د غویي ۲۲مه) په کافا جام سیالیو کې په خپله لومړۍ لوبه کې له ترکمنستان سره مخ شي. دغه لوبه به د غرمې په ۱۲:۰۰ بجو د تاجکستان په کوربهتوب پیل شي.
تر ۲۰کلنو کم عمره د ۲۰۲۶کال کافا جام سیالیو کې به پنځه لوبډلې ګډون وکړي، یادې سیالۍ به د روان ۱۴۰۵کال د غویي له ۲۰مې تر ۳۰مې پورې ترسره شي.
په دغه سیالیو کې تر ۲۰کلنو کم عمره افغان لوبډلې د لوبو مهالوېش:
افغانستان – ترکمنستان |سېشنبه د غویي ۲۲مه
افغانستان – ازبکستان |چهارشنبه د غویي ۲۳مه
افغانستان – تاجکستان |جمعه د غویي ۲۵مه
افغانستان – قرغزستان |یکشنبه د غویي ۲۷مه
د یادې لوبډلې مشري د افغانستان د فوټبال ملي لوبډلې د برازیلي روزونکي خوزه انتونیو نوګیرا په غاړه ده. افغان لوبډلې د ۲۰ لوبغاړو په جوړښت په دغه سیالیو کې ګډون کړی دی.
د تاجکستان په پلازمېنه دوشنبه ښار کې د لوبډلو د مدیرانو یوه رسمي غونډه هم وشوه او د ګډون کوونکو لوبډلو جامې هم نندارې ته وړاندې شوې.
په دغه سیالیو کې د ګډون کوونکو لوبډلو د روزونکو لپاره هم یوه رسنیزه غونډه جوړه شوه او د افغانستان د ۲۰ کلنو لوبډلې مشر روزونکي خوزه انتونیو نوګیرا تر لومړۍ لوبې وړاندې په رسنیزه غونډه کې برخه واخیسته.
