فارس خبري اژانس: ایران له ۵ باور جوړونکو شرطونو پرته له امریکا سره مذاکراتو ته نه داخلیږي
د سپاه پاسداران اړوند فارس خبري اژانس د یوې باخبره سرچینې له قوله راپور ورکړی، چې د ایران اسلامي جمهوریت به له امریکا سره د مذاکراتو دویم پړاو ته د «پنځو باور جوړونکو شرطونو» له پوره کېدو پرته داخل نهشي.
دې رسنۍ زیاته کړې، چې د ایران له لوري اعلان شوي شرطونه له امریکا سره د هر ډول خبرو د پیل لپاره لږ تر لږه د باور جوړونې تضمینونه دي.
فارس خبري اژانس د یوې «باخبره سرچینې» له قوله ویلي، چې د ایران اسلامي جمهوریت پنځه شرطونه دا دي: «په ټولو جبهاتو، په ځانګړي ډول لبنان کې د جګړې پای ته رسېدل، د بندیزونو لرې کېدل، د کنګل شویو پیسو ازادول، د جګړې له امله د اوښتو زیانونو جبران او پر هُرمز تنګي د ایران د حکومت د حاکمیت حق منل».
سپاه پورې تړلې دغې رسنۍ زیاته کړې، چې ایران د پاکستاني منځګړي له لارې امریکايي لوري ته ویلي، له اوربند وروسته د سمندري محاصرې دوام دا تصور لا پیاوړی کړی، چې له امریکا سره خبرې د باور وړ نهدي.
