افغان حاجیان د اسانتیاوو د نشتوالي او کمزورو خدمتونو له وړاندې کېدو شکایت لري

په ویډیو کې یو حاجي د دغه وضعیت په اړه خپله نارضایتي څرګنده کړې او له مسوولینو یې غوښتي، چې د افغان حاجیانو ستونزو او شرایطو ته جدي پاملرنه وکړي. د هغه په وینا؛ دوی تر عبادت وروسته د مناسب استوګنځي له نشتوالي سره مخ دي او ډېری وخت اړ کېږي، چې په واټونو کې کېني یا په موټرو کې پاتې شي.
هغه زیاتوي، چې د نورو هېوادونو حاجیانو ته ډېرې اسانتیاوې برابرې شوې دي؛ خو افغان حاجیان له ورته پاملرنې بې‌برخې دي. نوموړی همداراز ادعا کوي، چې د ګاونډیو هېوادونو حاجیان چې تر دوی یې کمې پیسې ورکړې له غوره خدمتونو برخمن دي؛ خو افغان حاجیان له ستونزو سره مخ دي.
د هغه په وینا؛ حتی یو افغان حاجي چې ورته نږدې خونه ورکړل شوې وه، وروسته یې خونه بل چاته ورکړل شوې او هغه ته یو لرې ځای ورکړل شوی دی. په خپره شوې ویډیو کې دا هم ښکاري، چې په یوه موټر کې درې کسان په یوې څوکۍ ناست دي، چې د ګڼې ګوڼې او د ترانسپورتي اسانتیاوو د کمښت ښکارندويي کوي.

دا په داسې حال کې ده، چې د طالبانو د حج او اوقافو وزارت هره ورځ د حاجیانو پیغامونه خپروي او وایي چې حاجیان له شته خدمتونو خوشحاله دي او ټولې لازمې اسانتیاوې ورته برابرې شوې دي.
تر دې وړاندې د سویلي ولایتونو یو شمېر حاجیانو هم افغانستان انټرنشنل ته ویلي و، چې طالبانو د حج فریضې اداکولو لپاره منظم ټرانسپورټ نه‌دی چمتو کړی او له حرم څخه ډېر لرې استوګنځایونه ورته نیول شوي دي.