د پنټاګون یوه لوړپوړي چارواکي د سېشنبې په ورځ وویل چې له ایران سره د امریکا د جګړې لګښت تر دې دمه ۲۹ میلیارده ډالرو ته رسېدلی. دا د تېرې میاشتې د اټکل په پرتله ۴ میلیارده ډالره زیاتوالی ښيي.
پنټاګون د اپرېل پر ۲۹مه ویلي وو چې د جګړې لګښت ۲۵ میلیارده ډالره دی.
د کویت د بهرنیو چارو وزارت اعلان کړی چې د ایران سفیر یې له دې امله احضار کړی چې په سپاه پاسداران پورې تړلې یوې ډلې «بوبیان» ټاپو ته د نفوذ هڅه کړې ده.
د کویت د کورنیو چارو وزارت ویلي، هغه څلور کسان چې د سمندر له لارې په ناقانونه توګه دغه هېواد ته داخل شوي وو، د پلټنو پر مهال یې د ایران د سپاه پاسداران انقلاب غړیتوب منلی دی.
د یاد وزارت په وینا، دغو کسانو اعتراف کړی، چې دوی ته د کب نیونې د یوې کښتۍ له لارې بوبیان ټاپو ته د نفوذ کولو لارښوونه شوې وه.
د خبرپاڼې له مخې، دغه کسان د کویټ له وسلهوالو ځواکونو سره ښکېل شوي چې په پایله کې یې یو کویټی سرتېری ټپي شوی او د نفوذي ډلې دوه غړي تښتېدلي دي.
په هالنډ کې یوه روغتون د احتیاطي اقدام په توګه ۱۲ روغتیايي کارکوونکي له دې امله قرنطین کړي، چې په هانټاویروس د اخته ناروغ د وینې او ادرار نمونې یې له سختو روغتیايي پروتوکولونو پرته سمبال کړې وې.
د نایمېخن ښار اړوند «رادبودومسي» روغتون ویلي، دغه کارکوونکي به د شپږو اونیو لپاره قرنطین وي، خو د ویروس د لېږدېدو خطر ډېر کم بلل شوی او د ناروغانو درملنه په عادي ډول روانه ده.
د روغتیا نړیوال سازمان ویلي چې په هانټاویروس د ککړوشویو کسانو شمېر نهو ته رسېدلی، چې د تېرې ورځې په پرتله دوه زیات دي. دغه سازمان خبرداری ورکړی چې د ویروس د اوږدې پټې مودې له امله ښايي نورې پېښې هم ثبت شي، خو دا وضعیت د کووېډ-۱۹ په څېر وبا نه ده.
دغه ویروس، چې معمولاً د وحشي موږکانو له لارې خپرېږي، په نادرو مواردو کې د انسانانو ترمنځ هم د نږدې تماس له لارې لېږدېدای شي.
د روغتیا نړیوال سازمان مشر تدروس ادهانوم ګبریسوس ویلي چې ټولې مشکوکې پېښې جلا ساتل شوې او تر سخت طبي څار لاندې دي، څو د ویروس د لاخپرېدو مخه ونیول شي.
د راپورونو له مخې، د «هوندیوس» په نوم له لوکس کروز بېړۍ سره تړاو لرونکې دغه پېښې اوس څو هېوادونو ته غځېدلې دي. تر دې دمه درې کسان، چې یوه هالنډۍ جوړه او یو جرمنی وګړی پکې شامل دي، مړه شوي دي.
هسپانیا، فرانسې، ایټالیا او امریکا هم د احتمالي او تایید شویو پېښو راپورونه ورکړي او یو شمېر کسان یې قرنطین کړي دي. نړیوال روغتیايي چارواکي هڅه کوي د ویروس د خپرېدو مخه ونیسي.
د امریکا حکومت پر درېیو کسانو او نهو شرکتونو چین ته د ایران د تېلو لېږد او پلور په برخه کې د همکارۍ له امله بندیزونه اعلان کړي. د امریکا خزانې وزارت ویلي، په بندیزونو کې شامل شرکتونه په هانګکانګ، متحده عربي اماراتو او عمان کې مېشت دي.
د واشنګټن په وینا؛ دغه شرکتونو او کسانو د ایران د سپاه پاسداران ځواکونو لپاره د صوري شرکتونو له لارې د ایراني تېلو د پلور او لېږد اسانتیا برابره کړې ده. د امریکا د خزانې وزیر سکاټ بېسنټ ویلي، چې د ټرمپ اداره به د بندیزونو کارولو ته دوام ورکړي؛ څو د ایران حکومت او پوځ د وسلو، اټومي پروګرام او سیمهییزو ډلو د ملاتړ له مالي سرچینو محروم کړي.
د دغه شرکتونو له ډلې د هانګکانګ «بلو اوشن» او «سانمو» شرکتونه، د دوبۍ «اوشن الیانز شېپېنګ» شرکت، د شارجې «اتیک انرژي» او د عمان «زیوس لوجستیک ګروپ» شامل دي.
امریکا وایي، ځینو دغه شرکتونو په ۲۰۲۵کال کې د ایران د تېلو د لېږد لپاره له بندیز لاندې ټانکرونو سره همکاري کړې ده. راپور د درېیو هغو کسانو نومونه نهدي یاد کړي؛ خو ویل شوي چې هغوی د ایران د سپاه پاسداران ځواکونو د «شهید پورجعفري» د تېلو له مرکز سره کار کوي او د «Golden Glob» شرکت له لارې یې د پیسو همغږي کوله.
دغه بندیزونه څو ورځې مخکې له هغې اعلان شوي، چې ټاکل شوې د امریکا ولسمشر ډونالډ ټرمپ د چین له ولسمشر شي جېن پېنګ سره وګوري. راپورونه ښیي، واشنګټن له بیجېنګ غواړي چې له ایران سره د کړکېچ په کمولو او د هرمز تنګي د وضعیت په اړه مرسته وکړي.
د تحریک انصاف ګوند بنسټګر او د پاکستان د پخواني لومړي وزیر عمران خان خور عظمی خان د اسلاماباد سترې محکمې ته عریضه کړې او غوښتنه یې کړې، چې عمران خان دې د مناسبې روغتیایي درملنې لپاره شفا نړۍوال روغتون ته ولېږدول شي.
په عریضه کې ویل شوي، عمران خان د سترګې له جدي ناروغۍ او د وینې لخته کېدو له ستونزې سره مخ دی چې ښايي د زړه یا دماغو لپاره یې هم ګواښ رامنځته کړي. د هغه کورنۍ ویلي، چې په زندان کې ورته لازمې طبي اسانتیاوې نه برابرېږي او دوامداره روغتیایي پاملرنې ته اړتیا لري.
په عریضه کې دا هم راغلي، چې د عمران خان شخصي ډاکټرانو او کورنۍ ته د هغه د لیدو اجازه نه ورکول کېږي او دا د اساسي او بشري حقونو خلاف کړنه ده. د عمران خان کورنۍ د اسلاماباد سترې محکمې هغه پرېکړه هم ننګولې، چې یوازې یې د طبي بورډ د جوړولو امر کړی و.
په عریضه کې د نواز شریف او اصف علي زرداري یادونه هم شوې او ویل شوي، چې نورو سیاسي مشرانو ته د بند پرمهال پراخې روغتیایي اسانتیاوې ورکړل شوې وې. عریضه کاږي، د ناروغ زنداني کورنۍ حق لري چې هغه ته لاسرسی ولري او ډاډ ترلاسه کړي چې مناسبه درملنه او روغتیايي پاملرنه ور رسېږي.
د عریضې له مخې؛ دغه کار یوازې هغه مهال شونی دی چې د زنداني د درملنې له بهیره یې کورنۍ باخبره وي او په دوامداره توګه معلومات ورکړل شي. په عریضه کې راغلي، عمران خان او د هغه کورنۍ څو ځله شکایت کړی چې د هغه ژوند او روغتیا له ګواښ سره مخ ده؛ خو یادې خبرې ته هیڅ ډول پاملرنه نهده شوې.
د عمران خان کورنۍ سربېره پر دې د هغه شخصي ډاکټرانو ته د معاینې اجازې نه ورکول او ان له کورنۍ سره یې پر ملاقات بندیز ناقانونه کار ګڼلی دی. د عمران خان کورنۍ په وار، وار د هغه د روغتیا په اړه اندېښنه ښودلې وه.
تر دې وړاندې د هغه وکیل ویلي و، چې د عمران خان ښۍ سترګې خپل ۸۵سلنه لید له لاسه ورکړی دی. بل لور ته د زندان چارواکي ادعا کوي، چې عمران خان ته په منظمه توګه روغتیایي اسانتیاوې برابرېږي او روغتیايي وضعیت یې تر پخوا ښه دی.
وال سټریټ ژورنال ورځپاڼې د «باخبره سرچینو» په حواله راپور ورکړی، چې متحده عربي اماراتو په پټه د ایران پرضد پوځي بریدونه ترسره کړي دي. د راپور له مخې؛ متحده عربي اماراتو په ښکاره ډول د دغه بریدونو پخلی نهدی کړی.
د یادې ورځپاڼې په وینا؛ دغه اقدام متحده عربي امارات د جګړې د اړخ په توګه پېژني. وال سټریټ ژورنال زیاته کړې، چې په دغه بریدونو کې د فارس خلیج په لاوان ټاپو کې د ایران پر یوې تصفیې خونې هم برید شوی.
ویل شوي، چې دغه برید د وري میاشتې په منځنیو ورځو کې شوی و. د راپور په بله برخه کې راغلي، چې متحده عربي امارات اوس تهران د خپل ټیکاو او اقتصاد لپاره مستقیم ګواښ ګڼي.
یادې ورځپاڼې همداراز لیکلي: «د اټکلونو له مخې ویل کېږي، چې متحده عربي اماراتو د خپلو فرانسوي میراژ جنګي الوتکو او چینایي بېپیلوټه الوتکو پرمټ د ایران دننه عملیات کړي دي».
د وال سټریټ ژورنال په وینا؛ امریکا د جګړې په برخه کې د متحده عربي اماراتو له ګډون څخه ناخوښه نهدی او په غیرعلني ډول یې د خلیجي هېوادونو له هغې همکارۍ هرکلی کړی، چې د ایران پرضد ترسره کېږي.