د ځانګړو ځواکونو پخوانی افسر: د ترکیې په پنډغالو کې له کړاو سره مخ یو
د ځانګړو ځواکونو یو پخواني افسر د ترکیې له یوه پنډغالي افغانستان انټرنشنل - پښتو ته په لېږلي غږیز پیغام کې ویلي، چې له یوشمېر پخوانيو پوځي همکارانو سره د ترکیې په پنډغالو کې بند پاتې دی.
نوموړي ویلي، چې دوی د عادي خلکو په څېر د ژوند له هرې ازادۍ بېبرخې دي او اوسمهال د یوه ناروښانه برخلیک سره مخ دي. دغه پخواني افغان افسر د امنیتي ستونزو له کبله د نوم نه اخیستلو په شرط ویلي، چې دوی د ترکیې د کډوالو له ادارو سره ثبت دي او د هغوی له اجازې پرته نهشي کولی بهر ووځي، کار وکړي او یا هم زدهکړې وکړي.
نوموړي زیاته کړې، چې په دغه پنډغالو کې سلګونه پخواني پوځیان نورو هېوادونو ته د تګ په تمه دي؛ خو لاتراوسه یې برخلیک نهدی روښانه. دغه پخواني افسر په ملګرو ملتونو او د برېتانیا پر حکومت چې وړاندې یې ورسره همکاري کړې وه غږ کړی، چې د دوی د کډوالۍ قضیې وڅېړي.
له بل پلوه د افغان کډوالو یوه ډله د ترکیې پر پوله ساتوځواکو تور لګوي، چې د ایران او ترکیې په پوله کې یې د هغوی ګوتې پرې کړې او ټپیان کړي یې دي. دغه کډوالو افغانستان انټرنشنل ته په استول شوي ویډیويي پیغام کې ادعا کړې، چې له پولې د اوښتو پرمهال د ترکیې سرحدي ځواکونو تاوتریخوالی ورسره کړی دی.
