جيډي وېنس: د امریکا او ایران مذاکرات د پرمختګ په حال کې دي
د امریکا د ولسمشر مرستیال جيډي وېنس وایي، د متحده ایالاتو او ایران ترمنځ روان مذاکرات د پرمختګ په حال کې دي، خو اصلي موخه دا ده چې ایران هېڅکله اټومي وسلې ته لاسرسی پیدا نه کړي.
هغه په سپینه ماڼۍ کې خبریالانو ته ویلي، چې دغه مذاکرات ډېر حساس دي او نوموړي د چهارشنبې په سهار له جرد کوشنر، سټیو وېټکاف او د عربي هېوادونو له یو شمېر چارواکو سره خبرې کړې دي.
هغه زیاته کړې: «زما په اند موږ د پرمختګ پر لور روان یو.»
جيډي وېنس ویلي، اساسي پوښتنه دا ده چې ایا دغه پرمختګونه د ولسمشر د «سرې کرښې» د پوره کولو لپاره بسنه کوي که نه. د هغه په خبره، د امریکا د ولسمشر اساسي شرط دا دی چې داسې تضمینونه او حفاظتي میکانیزمونه رامنځته شي چې ایران هېڅکله اټومي وسلې ته لاسرسی ونه لري.
د امریکا د ولسمشر مرستیال ویلي، له پاکستان څخه د دوی تر وتلو وروسته په خبرو کې نور پرمختګ هم شوی او د مذاکراتو اصلي موخه دا ده چې امریکایي وګړي ډاډمن شي چې «یو خطرناک رژیم» به د نړۍ تر ټولو خطرناکو وسلو ته لاسرسی ونه لري.
هغه ټینګار کړی چې اوس مهال د امریکا اداره پر ډیپلوماسۍ تمرکز لري او ولسمشر د خبرو اترو لاره غوره کړې ده.
