طالبانو د کابل د منډوي هټۍ وتړلې
د کابل په منډوي کې یو هټۍوال افغانستان انټرنشنل ته ویلي، چې طالبانو له تېرو دوو ورځو راهیسې په یاده سیمه کې ګڼې هټۍ تړلې او سوداګرو ته د فعالیت اجازه نه ورکوي. هغه د یوه تصویر په لېږلو سره ویلي، چې طالب مامورانو د دوی د ملکیتونو او توکو د ویجاړولو سربېره هټۍوال هم وهلي دي.
د نوموړي لهخوا د چهارشنبې په ورځ (د غویي ۲۳مه) په رالېږلې ویډیو کې ښکاري، چې طالبانو د کابل په منډوي کې ګڼې هټۍ تړلې دي او د ځینو هټۍوالو توکو یې پر ځمکه غورځولي دي.
تر دې وړاندې د کابل د منډوي د انتقال طرحې په اړه ځینې راپورونه خپاره شوي وو؛ خو د طالبانو د کور او ښار جوړونې وزارت (د غویي په ۱۵مه) ویلي و، چې د کابل ښار د منډوي د انتقال طرحه تر غور لاندې نهده او په دې اړه خپاره شوي معلومات ناسم دي.
یاد وزارت ویلي و، چې د «کابل منډوي د انتقال یا د ښار په شاوخوا کې د نورو مارکېټونو جوړولو» یوازې یادونه شوې ده. یاد وزارت وزارت په وضاحتي خبرپاڼه کې لیکلي و: «که څه هم په خپره شوې خبرپاڼه کې په ضمني ډول د ښاري ګڼې ګوڼې د کمولو موضوع ته اشاره شوې وه او د «کابل منډوي د انتقال یا د ښار په شاوخوا کې د نورو مارکېټونو جوړولو» یادونه هم شوې وه؛ خو دغه موضوع نه د غونډې اساسي محور و او نه هم پرې کومه پرېکړه شوې ده».
