ملګرو ملتونو له اسراییل غوښتي چې د اکتوبر اوومې ځانګړې پوځي محکمه لغوه کړي

فرانس ۲۴ شبکې راپور ورکړی، چې تورک د چهارشنبې په ورځ ویلي، د هغو فلسطیني وسله‌والو د محاکمې لپاره چې د حماس په مشرۍ د اکتوبر اوومې بریدونو کې په لاس لرلو تورن دي، د ځانګړې پوځي محکمې جوړول د نړیوالو معیارونو خلاف اقدام ګڼل کېږي.

فولکر تورک په یوې اعلامیې کې ټینګار کړی، چې د دغو «ویرونکو بریدونو» په اړه باید بشپړ حساب ورکول موجود وي، خو د هغه په وینا، دا موخه د داسې محکمو له لارې نه شي ترلاسه کېدای چې له نړیوالو معیارونو سره واټن ولري.

د اسراییل پارلمان د دوشنبې په شپه داسې قانون تصویب کړ چې له مخې یې یوه ځانګړې پوځي محکمه جوړېږي او د اعدام د حکم صادرولو واک به هم ولري.

ټاکل شوې دغه محکمه هغه کسان محاکمه کړي چې د حماس په مشرۍ د اکتوبر اوومې بریدونو پر مهال یا تر هغې وروسته نیول شوي دي. همداراز، هغه کسان چې په غزه کې د یرغمل شویو کسانو د ساتلو یا ځورولو په تړاو پرې شک موجود وي، په همدې محکمه کې به محاکمه کېږي.

د اسراییلي رسنیو د راپورونو له مخې، تمه کېږي شاوخوا ۴۰۰مشکوک کسان په دې ځانګړې محکمه کې محاکمه شي.

د بشري حقونو فعالان او نړیوال بنسټونه اندېښنه لري چې دغه ډول ځانګړې پوځي محکمې ښايي د عادلانه محاکمې له اصولو سره په ټکر کې واقع شي او د تورنو کسانو اساسي حقوق تر پوښتنې لاندې راولي.