شپږو عربي هېوادونو له ایران څخه د غرامت ورکولو غوښتنه کړې
د فارس خلیج شپږو عربي هېوادونو د ملګرو ملتونو امنیت شورا ته په یو لیک کې له ایران څخه د غرامت غوښتنه کړې او د هُرمز تنګي په اړه یې د تهران ادعاوې رد کړې دي.
د بحرین دولتي رسنۍ «بنا» د پنجشنبې په ورځ (د غويي ۲۴مه) راپور ورکړی، چې متحده عربي امارات، سعودي عربستان، کویت، قطر، بحرین او اردن په یو ګډ لیک کې د ایران هغه څرګندونې غندلي چې ګواکې تهران غواړي د هرمز تنګي د مدیریت یا د دې مهمې سمندري لارې لپاره نوي قوانین وضع کړي.
په لیک کې راغلي، چې د ایران دغه دریځ د نړیوالو اصولو خلاف دی او ټینګار شوی چې د هرمز تنګی یو حیاتي نړیواله سمندري لاره ده چې د سوداګرۍ، انرژۍ او نړیوال تګ راتګ لپاره خورا مهم رول لري.
یادو هېوادونو ویلي چې هېڅ هېواد، پرته له دې چې جغرافیایي موقعیت یې څه وي، حق نه لري چې په یوازیتوب د دې تنګي لپاره یو اړخیز مدیریت یا ځانګړي قوانین جوړ کړي.
په یوه جلا لیک کې متحده عربي اماراتو ایران د مهمو غیرنظامي او حیاتي زیربناوو پر «قصدي بریدونو» تورن کړی دی.
دا هېوادونه له ملګرو ملتونو او امنیت شورا غوښتي چې د دې موضوع په اړه جدي اقدام وکړي او د نړیوالو اوبو د امنیت لپاره تضمینونه رامنځته کړي.
