د خیبر پښتونخوا حکومت له وسله والو سره په همکارۍ د تورنو دولتي کارکوونکو معلومات ټولوي
د خیبر پښتونخوا حکومت د هغو دولتي کارکوونکو او قراردادیانو پر ضد د ګام پورته کولو پرېکړه کړې، چې له وسله والو ډلو سره په همکارۍ تورن دي. د دغه ایالت د کورنیو چارو وزارت خپلو اړوندو ادارو ته د دوه زره کسانو د پېژندلو او معلوماتو راټولولو دنده سپارلې ده.
د رسمي سرچینو له مخې، د څه باندې دوه زره هغو دولتي کارکوونکو او دولتي قراردادیانو معلومات راټولېږي چې له وسله والو ډلو سره په همکارۍ او یا هم هغوی ته د اسانتیاوو په رامنځته کولو تورن دي.
د خیبر پښتونخوا د کورنیو چارو وزارت په یوه سند کې راغلي چې د دغو کسانو پر ضد د جدي اقدام پرېکړه شوې ده.
د دغه رسمي سند پر بنسټ، ټولو اړوندو دولتي ادارو ته لارښوونه شوې چې د تورنو کارکوونکو نوملړ او معلومات تنظیم کړي. ټاکل شوې چې دا راټول شوي معلومات به وروسته خوندي او انلاین شي.
سرچینې زیاتوي چې د معلوماتو له بشپړېدو وروسته به د دغو کسانو پر ضد عملي ګامونه واخیستل شي او نومونه به یې په «شیډول فور» کې شامل شي.
شیډول فور د پاکستان د ترهګرۍ ضد قوانینو یوه برخه ده، چې حکومت پکې ډېری د سیاسي مخالفانو او مشکوکو کسانو نومونه ثبتوي.
په دغه نوملړ کې د پي ټي ایم په څېر د بشري حقونو اړوند غورځنګونو د غړو نومونه هم اچول شوي دي.
د خیبر پښتونخوا حکومت ددې اقدام په اړه یو شمېر شنونکي په دې باور دي، چې وسله وال جنګیالي او هغه ډلې، چې د « ښه طالبان» په نامه مشهورې دي، ښايي د نویو اقداماتو برخه ونه ګرځي، ځکه ډېر وخت حاکم امنیتي سیاستونه د هغوی لپاره ملاتړی چتر ګرځي.
