تر ۲۰کلنو کم عمره د افغانستان فوټبال لوبډلې د ۲۰۲۶کال کافا جام سیالیو په دویمه لوبه کې د ازبکستان په وړاندې د ۲-۰ په توپير ماتې وخوړه. دغه لوبه چې د تاجکستان په پلازمېنه کې ترسره شوه، افغان لوبډلې پهکې پرلهپسې دویمه ماتې وخوړه او د جدول په پای کې پرته له کوم امتیازه پاتې شوه.
افغان لوبډلې د لوبې په لومړۍ پاڼۍ کې دوه ګولونه ورکړل او د لوبې په پاتې برخه کې هیڅ لوبډله ونه توانېده، چې کوم ګول ترسره کړي. د ازبکستان لوبغاړو یوازې په درېیو دقیقو کې د لوبې برخلیک وټاکه؛ لومړی ګول په ۲۰مه دقیقه کې او دویم ګول په ۲۳مه دقیقه کې ترسره شو.
دا دویمه لوبه وه، چې د خوزه انتونیو نوګیرا لوبډلې په لومړۍ نیمایي کې ډېر کمزوری فعالیت پهکې ترسره کړ. افغانستان په لومړۍ لوبه کې د ترکمنستان په وړاندې د ۳-۱ په توپیر ماتې وخوړه، په داسې یوه لوبه کې چې د ترکمنستان درې واړه ګولونه په لومړۍ نیمایي کې ووهل شول.
تر ۲۰ کلنو کم عمره د افغانستان د فوټبال لوبډلې تراوسه پورې په دوو لوبو کې پنځه ګولونه خوړلي او یوازې یو ګول یې وهلی؛ دغه شمېره ښیي، چې لوبډله په دفاعي برخه کې له جدي ستونزو سره مخ ده.
تر ۲۰کلنو کم عمره د ۲۰۲۶کال کافا جام سیالیو کې پنځو لوبډلو برخه اخیستې ده، یادې سیالۍ د روان ۱۴۰۵کال د غویي له ۲۰مې تر ۳۰مې پورې ترسره کېږي.
په دغه سیالیو کې تر ۲۰کلنو کم عمره افغان لوبډلې د لوبو مهالوېش:
افغانستان – ترکمنستان |سېشنبه د غویي ۲۲مه
افغانستان – ازبکستان |چهارشنبه د غویي ۲۳مه
افغانستان – تاجکستان |جمعه د غویي ۲۵مه
افغانستان – قرغزستان |یکشنبه د غویي ۲۷مه
د یادې لوبډلې مشري د افغانستان د فوټبال ملي لوبډلې د برازیلي روزونکي خوزه انتونیو نوګیرا په غاړه ده. افغان لوبډلې د ۲۰ لوبغاړو په جوړښت په دغه سیالیو کې ګډون کړی دی.
