د لنډي کوتل چارواکو او مشرانو په افغانستان کې د بندپاتې پاکستانیانو د ستنېدو غوښتنه کړې
د خیبر پښتونخوا د لنډي کوتل قومي مشرانو او چارواکو په یوې جرګه کې د تورخم لارې بندېدو ستونزو او په افغانستان کې د بندپاتې پاکستاني وګړو د ستنېدو په اړه خبرې کړې. دغه قومي مشرانو ویلي، چې د لارو تړل کېدو له کبله سلګونه کسان له ستونزو سره مخ دي او دوه اړخیزه سوداګري اغېزمنه شوې ده.
په لنډي کوتل کې د افغانستان انټرنشنل - پښتو خبریال جواد شینواری وایي، چې په دغه ناسته کې د افغانستان او پاکستان ترمنځ د سوداګرۍ د رامنځته شویو ستونزو او د بند پاتې پاکستاني وګړو د ستنېدو په اړه خبرې شوې.
د جرګې غړي بنارس شینواري ویلي، چې د لارو بندېدو له کبله دوه اړخیزه سوداګري او کاروبار زیانمن شوی. دوی له افغان طالبانو غوښتنه کړې، چې د تورخم پر لار بند پاتې پاکستاني وګړي او موټرو ته د بېرته ستنېدو اجازه ورکړي.
یادې جرګې د لارې پر خلاصېدو او د سوداګریزو فعالیتونو پر ژر پیلېدو ټینګار کړی او د عملي اقدام غوښتنه یې کړې. پاکستاني چارواکو دا نهدي ویلي، چې په څومره شمېر وګړي یې په افغانستان کې بندپاتې دي.
طالبانو هم لاتراوسه د پاکستان قومي مشرانو او حکومتي چارواکو دې ناستې ته کوم غبرګون نهدی ښودلی.
