چین ټرمپ ته خبرداری ورکړی چې د تایوان په اړه ناسم چلند شخړې رامنځته کولی شي
د چین ولسمشر شي جینپینګ د امریکا ولسمشر ډونالډ ټرمپ ته ویلي چې د دواړو هېوادونو ترمنځ د سوداګرۍ خبرې پرمختګ کوي، خو د تایوان په اړه اختلافات کولی شي اړیکې خطرناک لوري ته یوسي او حتا د شخړې لامل شي.
دا خبرې د چین د بهرنیو چارو وزارت په وینا په یوه تړلې غونډه کې وشوې، چې نږدې دوه ساعته یې دوام کړی.
تایوان، چې ځانواکه ډیموکراټیکه سیمه ده خو چین یې خپله برخه ګڼي، د خبرو مهم ټکی و.
دا لیدنه په داسې وخت کې شوې چې د امریکا ولسمشر د ایران له جګړې او اقتصادي فشارونو سره مخ دی او غواړي له چین سره اقتصادي پرمختګونه ډېر شي. ټرمپ دا لیدنه «تر ټولو لویه سرمشریزه» بللې ده.
د چین د بهرنیو چارو وزارت ویلي چې د اقتصادي او سوداګریزو ټیمونو ترمنځ خبرې په جنوبي کوریا کې مثبتې پایلې لرلې او د لنډمهالې سوداګریزې موافقې د پیاوړتیا هڅه روانه ده.
په دې خبرو کې د بازارونو پر پرانیستلو، د پانګونې پراختیا او د اقتصادي اړیکو پر ښه کولو تمرکز و.
