ولادیمیر زیلنسکي: پر استوګنیزه ودانۍ برید کې د روسیې نوی تولید شوی توغندی کارول شوی
د اوکراین ولسمشر ولادیمیر زیلنسکي ویلي، چې د کییف پر یوې استوګنیزې ودانۍ د برید لپاره کارول شوی توغندی د همدې کال په دوهمه ربع کې تولید شوی و، او دا موضوع د روسیې له لوري د نړیوالو بندیزونو د ماتولو ښکارندويي کوي.
زیلنسکي په خپل ایکس پوسټ کې ویلي، د لومړنیو معلوماتو له مخې پر استوګنیزه ودانۍ د برید لپاره د( کې ایچ - ۱۰۱) توغندی کارول شوی دی.
هغه زیاته کړې، چې دغه توغندی د ۲۰۲۵ کال په دوهمه ربع کې جوړ شوی، چې د ده په وینا ښيي روسیه لا هم د نړیوالو بندیزونو سربېره د توغندیو د تولید لپاره اړین برخې، وسایل او سرچینې ترلاسه کوي.
د اوکراین ولسمشر ویلي، چې د بندیزونو د تېرېدو او پټولو د روسي شبکو مخنیوی باید د نړیوالو شریکانو لپاره «حقیقي لومړیتوب» وي.
زیلنسکي ټینګار کړی، چې د روسیې د بندیزونو د ماتولو لارې بندول د جګړې د اغېزو د کمولو او د ملکي خلکو د خوندیتوب لپاره مهم دي.
