د سنټکام مشر: د امریکا د ګټو ګواښلو لپاره د ایران وړتیا په ډراماتیک ډول کمه شوې ده
د امریکا د مرکزي قوماندانۍ (سینټکام) مشر براډ کوپر ویلي چې د امریکا د هوايي بریدونو له امله د ګاونډیو هېوادونو او امریکا د ګټو د ګواښلو لپاره د ایران وړتیا په پراخه کچه کمه شوې او د دغه هېواد دفاعي صنعت شاوخوا ۹۰ سلنه زیان لیدلی دی.
د امریکا د مرکزي قوماندانۍ (سینټکام) مشر کوپر د پنجشنبې په ورځ د امریکا د مشرانو جرګې یوې کمېټې ته وویل، ایران نور نه شي کولای لکه مخکې د سیمې هېوادونه او متحده ایالات په بېلابېلو برخو کې وګواښي.
هغه ټینګار وکړ چې د ایران پوځي ګواښ «خورا کمزوری شوی» دی.
کوپر زیاته کړې، ایران اوس د دې توان نه لري چې خپلو سیمهییزو متحدانو، لکه حزب الله، حماس او د یمن حوثیانو ته وسلې او نور امکانات انتقال کړي، ځکه د دغو لېږد لارو او میتودونو مخه نیول شوې ده.
نوموړي د هغو راپورونو په اړه مستقیم ځواب ور نه کړ چې وایي ایران لا هم د ځمکې لاندې تاسیساتو کې د توغندیو او بېپیلوټه الوتکو د پام وړ وړتیا ساتلې ده.
