پاکستان د انصاف ګوند له بنسټګر عمران خان سره د لیدنې په اړه د اپوزیسیون وړاندیز رد کړ
د پاکستان فدرالي حکومت د تحریک انصاف ګوند له بنسټګر عمران خان سره د لیدنې لپاره د اپوزیسیون وړاندیز رد کړ. په سنا کې د لومړي وزیر سلاکار رانا ثناالله وویل، چې د کمېټې جوړولو لپاره په قانون کې ځای او اجازه نهشته، چې پر بنسټ یې له بندیانو سره د سیاسي موخو لپاره لیدنې وشي.
د جيونيوز د خبر لهمخې، رانا ثناالله ویلي، چې بُشرا بي بي او د تحریک انصاف ګوند بنسټګر ته غوره درملنه چمتو کېږي، که اپوزیسیون له قواعدو سرغړونه نه وي کړې نو سترې محکمې ته دې مراجعه وکړي.
د حکومت لهخوا دغه څرګندونې په داسې حال کې څرګندې شوي، چې د جمعې په ورځ (د غويي ۲۵مه) په پارلمان کې د اپوزيسيون مشر محمود خان اڅکزي وويل، «حکومت دې په څرګند ډول ووايي، چې له عمران خان سره به ليدنه کله کيږي؟ بله دا چې هغه به د هغه خوښې روغتون ته کله ولېږدول شي»؟
هغه وويل، «په درېیو ورځو کې موږ له خپلو مشرانو سره ليدنې کوو، که د حکومت چلند داسې وو او بيا د دوشنبې په ورځ پارلمان نه چلېدو، مسوول به یې د پارلمان مشر وي».
له دې وړاندې په سنا کې د اپوزیسیون مشر راجه ناصر عباس له عمران خان او نورو بندیانو سره د لیدنې لپاره د حکومت او اپوزیسیون د غړو په ګډون د کمیټې جوړولو وړاندیز کړی وو.
د یادونې وړ ده، چې په افغانستان کې د جمهوري نظام له رانسکورېدو وروسته له نورو هېوادونو په ځانګړې توګه له پاکستان او ایران څخه نږدې ۵ میلیونه افغان کډوال د کوربه هېوادونو له لوري اېستل شوي دي. هغوی په افغانستان کې هم د سرپناه او کاروبار د نشتوالي تر څنګ له ګڼو ستونزو سره مخ دي.
د پښتون ژغورنې غورځنګ مشر منظور احمد پشتین ویلي، که یو قام خپل پارلمان، امنیت، عدالت، رسنۍ او پر خپله خاوره اختیا ونهلري، نو هغه قوم خپله له یو سخت ناورین سره مخ دی. هغه زیاتوي، پښتانه په دې جدید عصر کې له سخت زوال او ناورین سره مخ دی.
