د بدن جوړونې مشهور افغان لوبغاړي علي بلال ویلي، چې هغه به په دوو ورځو کې د پیټزبورګ پرو ۲۰۲۶کال سیالیو کې برخه واخلي. ټاکل شوې، چې دغه سیالۍ د مئ په ۱۶مه او ۱۷مه ترسره شي او د نړۍ یوشمېر غوره لوبغاړي پهکې برخه واخلي.
علي بلال چې په دې وروستیو کې یې د نیویارک پرو ۲۰۲۶کال اتلولي وګټله پر فیسبوک پاڼه لیکلي، چې هغه به د تېرو سیالیو پرتله په پوره چمتووالي د پیټزبورګ پرو سیالیو کې برخه واخلي. د هغه په وینا؛ په دغه سیالیو کې به د نیویارک پرو پرتله د لا ډېر چمتووالي سره راڅرګند شي.
دغه افغان لوبغاړی په دې وروستیو کې وتوانېده، چې برازیلي لوبغاړي اډوان پالمیرا ته ماتې ورکړي او د نیویارک-پرو په سیالۍ کې لومړی مقام خپل کړي.
علي بلال چې تل په نړۍوالو سیالیو کې د افغانستان له نوم او بېرغ سره راڅرګند شوی، وتوانېده چې په نیویارک کې د خپل غوره فعالیت، ښه فزیک او پیاوړي فعالیت سره د ټولو پام ځانته راواړوي.
هغه مخکې د ۲۰۲۴کال د ارنولډ کلاسیک سیالۍ اتلولي ګټلې وه او دارنګه په ۲۰۲۴ او ۲۰۲۵ کلونو کې دوه ځله د بدن ښکلا په کټګورۍ کې د ښاغلي اولمپیا په معتبره سیالۍ کې دویم مقام ترلاسه کړ.
