ټرمپ واشنګټن ته له رسېدو سره سم چین ته خپل سفر «ستره بریا» وبلله
د امریکا ولسمشر له بیجېنګ څخه تر ستنېدو وروسته په سپینې ماڼۍ کې خبریالانو ته وویل، چې سفر یې «ستره بریا» وه او «لویو هوکړو» ته رسېدلي دي. هغه د جمعې په ورځ (د غويي ۲۵مه) په واشنګټن کې زیاته کړه، چې «ډېر څه شوي» او ژر به د دغو پرېکړو جزییات خپاره شي.
ولسمشر ټرمپ وویل: «یوازنی څه چې ویلای شم دا دي، چې دا یوه ستره بریا وه. موږ لویو هوکړو ته ورسېدو. موږ ښې سوداګریزې هوکړې ترسره کړې». هغه دا سفر «فوقالعاده» او «رښتینې تاریخي شېبه» وبلله او ټینګار یې وکړ، چې د هوکړو بشپړ معلومات به وروسته شریک شي.
ټرامپ د هوکړو نوعیت او شمېر روښانه نهکړل، خو دومره یې وویل، چې د موضوعاتو په اړه «ډېر څه پېښ شوي» او رسنۍ به یې د جزییاتو اورېدونکې وي. د سپینې ماڼۍ له لوري د هوکړو رسمي متن یا شمېر نهدی خپور شوی.
له بلې خوا، د چین چارواکو په دې اړه سمدستي جزییات نهدي ورکړي.
د یادونې وړ ده، چې د امریکا ولسمشر ډونالډ ټرمپ د مې په ۱۳مه چین ته په یوه رسمي سفر تللی وو.
