د سرپل اوسېدونکي: د ولایتي روغتون امر طبي زدهکړې نه لري او د والي پخوانی ساتونکی و
د سرپل یو شمېر اوسېدونکو افغانستان انټرنشل ـ پښتو ته ویلي، چې طالبانو د دغه ولایت په ولایتي روغتون کې یو داسې کس د امر په توګه ګومارلی، چې هېڅ ډول طبي زدهکړې نه لري.
ځايي اوسېدونکو افغانستان انټرنشنل ـ پښتو ته ویلي، چې یاد کس د سرپل د پخواني والي مولوي ظریف نږدې کس و، چې لومړی یې د هغه د ساتونکي او وروسته یې د شخصي سکرتر په توګه دنده ترسره کوله، خو په دې وروستیو کې د ولایتي روغتون د امر په توګه ګومارل شوی دی.
د سرپل اوسېدونکي دغه ګومارنه ښکاره بېعدالتي بولي او وايي، په داسې حال کې چې په دغه ولایت کې ګڼ متخصص ډاکټران او تجربه لرونکي روغتیايي کارکوونکي بېکاره دي، د روغتون مهمه او مسلکي دنده داسې چا ته سپارل شوې چې په طبي چارو کې هیڅ پوهه نه لري.
د یادونې وړ ده چې دغه ادعاوې یوازې د سرپل د یو شمېر اوسېدونکو روایت دی او تر اوسه په خپلواکه توګه نه دي تایید شوې.
