یو شمېر دولتي مامورینو افغانستان انټرنشنل ته ویلي، چې طالبانو د تېر ۱۴۰۴ کال د کب او د روان ۱۴۰۵ کال د وري میاشتې معاشونه لا هم نهدي ورکړي. دغه مامورین زیاتوي، دوی له سختو اقتصادي ستونزو سره مخ دي او د معاشونو د نهورکړې له امله یې ورځنی ژوند له جدي ستونزو سره مخ شوی دی.
دغو مامورینو ویلي، چې اړوندو ادارو ته یې څو ځله مراجعه کړې، خو دوی په «نن او سبا» تېر باسي، خو تر اوسه عملي اقدام نهدی شوی.
دوی وایي، اختر هم رانږدې شوی، خو د اختر لپاره د چمتووالي وس نهلري او له دې امله سخت اندېښمن دي. د مامورینو په خبره، نهشي کولی خپلو ماشومانو ته د اختر جامې او نور لومړني اړتیاوې برابرې کړي.
دوی زیاتوي، چې د کور کرايې، خوراکي توکو او نورو لومړنیو اړتیاوو د برابرولو توان یې کم شوی او نه پوهېږي چې دغه وضعیت به تر کومه دوام وکړي.
د یادونې وړ ده، چې دغه ادعاوې یوازې د یو شمېر دولتي مامورینو روایت دی او تر اوسه په خپلواکه توګه نهدي تایید شوې.
د طالبانو مشر مولوي هبت الله د روان ۱۴۰۵ مالي کال بودجه تایید کړې ده | افغانستان انټرنشنل پښتو
دا په داسې حال کې ده، چې د طالبانو مشر هـبتالله اخوندزاده د روان ۱۴۰۵ مالي کال بودجه تایید کړې، خو لا تر اوسه په رسمي توګه د بودجې جزییات نهدي خپاره شوي.
