د پاکستان بازارونو کې د یوې تولې سرو زرو په بیه کې ۱۵ زره ۵۰۰ کلدارې کمښت راغلی دی. د پاکستان د سرو زرو ټولنې د معلوماتو لهمخې، د جمعې په ورځ (د غويي ۲۵مه) په ځايي صرافه بازار کې د ۲۴ قیراط سرو زرو په بیه کې ۱۵ زره ۵۰۰ روپۍ کمښت راغلی او ۴ لکه ۷۶ زره ۸۶۲ روپیو ته رسېدلې ده.
د ځايي رسنيو د راپور لهمخې، همدارنګه د ۱۰ ګرامه سرو زرو په بیه کې ۱۳ زره ۲۸۹ کلدارې کمښت راغلی دی، چې له دې وروسته یې نوې بيه ۴ لکه ۸ زره ۸۳۲ کلدارې ټاکل شوې ده.
ويل شوي، په نړیوال مارکيټ کې هم د سرو زرو بیه د ۱۵۵ ډالرو په کمی سره تر فياونس ۴ زره ۵۴۵ ډالرو پورې راښکته شوې ده.
ایسوسیېشن وایي، په ځايي کچه په بیو کې د کمښت اساسي لامل په نړیوال مارکېټ کې د سرو زرو د بیو راټېټېدل دي.
د پاکستان فدرالي حکومت د تحریک انصاف ګوند له بنسټګر عمران خان سره د لیدنې لپاره د اپوزیسیون وړاندیز رد کړ. په سنا کې د لومړي وزیر سلاکار رانا ثناالله وویل، چې د کمېټې جوړولو لپاره په قانون کې ځای او اجازه نهشته، چې پر بنسټ یې له بندیانو سره د سیاسي موخو لپاره لیدنې وشي.
د جيونيوز د خبر لهمخې، رانا ثناالله ویلي، چې بُشرا بي بي او د تحریک انصاف ګوند بنسټګر ته غوره درملنه چمتو کېږي، که اپوزیسیون له قواعدو سرغړونه نه وي کړې نو سترې محکمې ته دې مراجعه وکړي.
د حکومت لهخوا دغه څرګندونې په داسې حال کې څرګندې شوي، چې د جمعې په ورځ (د غويي ۲۵مه) په پارلمان کې د اپوزيسيون مشر محمود خان اڅکزي وويل، «حکومت دې په څرګند ډول ووايي، چې له عمران خان سره به ليدنه کله کيږي؟ بله دا چې هغه به د هغه خوښې روغتون ته کله ولېږدول شي»؟
هغه وويل، «په درېیو ورځو کې موږ له خپلو مشرانو سره ليدنې کوو، که د حکومت چلند داسې وو او بيا د دوشنبې په ورځ پارلمان نه چلېدو، مسوول به یې د پارلمان مشر وي».
له دې وړاندې په سنا کې د اپوزیسیون مشر راجه ناصر عباس له عمران خان او نورو بندیانو سره د لیدنې لپاره د حکومت او اپوزیسیون د غړو په ګډون د کمیټې جوړولو وړاندیز کړی وو.
په پاکستان کې د افغان کډوالو په کمپونو کې يو یې د کراچۍ ښار ختيځ لور ته شاوخوا ۱۸ کيلومترۍ کې موقعيت درلود. خپل هېواد ته د افغان کډوالو تر اېستلو وروسته دغه کمپ نړول شوی او اوس پهکې څوک نهاوسيږي. ځايي خلک وايي: «افغانان ښه خلک وو، بايد بېرته نه وای لېږل شوي».
د نړول شوي کمپ په څنډه او ګاونډ کې مېشتو ځايي خلکو افغانستان انټرنشنل- پښتو ته وويل، د افغان کډوالو يادونه ورسره پاتې دي او تل به یې په ياد ساتي. هغوی وويل: «افغانان له هر اړخه ښه خلک وو».
په نړول شوي کمپ کې يوازې جوماتونه پاتې دي. د يوه جومات ملا امام احمد مزاري وويل: «د پښتنو يو دود مېلمهپالنه ده، افغان کډوالو هم تر هغه وخته چې دلته اوسېدل، مېلمهپالنه کوله. هغوی دا هېواد خپل ګاڼه، موږ هېڅکله دا احساس نه دی کړی، چې هغوی د افغانستان دي او موږ د پاکستان».
هغه وويل: «افغانان زموږ وروڼه دي، مدرسو او جوماتونو ته به تلل. دلته چې اوسېدل، زموږ ورسره د ورورولۍ اړيکې وې او اوس یې ډېر کمی احساسوو.»
احمد مزاري افغانستان ته د افغان کډوالو د بېرته ستنولو په اړه وويل: «دا د حکومتي قانون موضوع وه، ځکه پرې عمل کېده».
د افغان کمپ ترڅنګ يوه هټيوال محمد عامر وويل، افغانان په راکړه ورکړه کې ښه خلک وو او له کله راهسې چې تللي دي، دلته کاروبار کابو په ټپه درېدلی دی.
هغه وويل: «هغوی له موږ سره د عامو پاکستانيانو په څېر اوسېدل. موږ هېڅکله دا فکر نهکاوه، چې افغانستان بېل هېواد دی. موږ ته دواړه هېوادونه يو شان دي».
عامر زياته کړه: «افغانانو به ځايي خلک خپلو ښاديو او مېلمستياوو ته بلل. موږ خلک دومره ژر له نورو سره اشنايي نهجوړوو، خو هغوی ډېر ښه خلک وو. که زما نه پوښتنه وشي، زه وايم، چې کډوال بايد بېرته نه وای لېږل شوي، خو دا د حکومت پاليسي وه، نو موږ پهکې څه ويلی شو».
عامر وويل: «ناسته ولاړه یې خوندوره وه او په دوستۍ کې ډېر کلک خلک وو».
د کمپ په څنډه کې یوه ځايي اوسېدونکي ۲۷ کلن محمد شعيب افغانستان انټرنشنل- پښتو ته وويل، افغانان کاروباري خلک وو، خپله خواري او مزدوري به یې کوله او هېچا سره یې کار او غرض نهوو.
هغه وويل: «له دغو خلکو سره ډېر ظلم وشو. هغوی ښکلي کورونه جوړ کړي وو، خو ونړول شول او د هغوی تاوان هم ورنهکړل شو. زما په اند، بايد دغه خلک بېرته نه وای لېږل شوي او اوس چې تللي، دا سیمه شاړه شوې ده. حکومت ته پهکار ده، چې دلته نور خلک راولي او سیمه بېرته اباده کړي».
کمپ ته څېرمه د يوه رسټورانټ چلوونکي عبدالوحيد لهړي وويل، د کمپ له خالي کېدو وروسته تر ټولو زيات مالي زيان ده ته رسېدلی دی.
هغه وويل: «کله چې کمپ اباد و، زموږ د رسټورانټ هره ورځ د څلورو تر پنځو لکو کلدارو (روپيو) کاروبار کېده، خو اوس په ورځ کې يو نيم لک هم نهکيږي».
د افغان کډوالو کمپ د کراچۍ د ګلشن معمار پوليس تاڼې په حدودو کې راځي. د پوليسو د شمېرو له مخې، د ۲۰۲۵م کال د اپرېل له مياشتې د ۲۰۲۶م تر مارچ پورې يوازې له دغه کمپ څخه ۱۷۴۲۵ کډوال اېستل شوي، چې له ۱۲ زرو زيات یې دپياوار او نږدې ۱۵۰۰ یې د اېسيسي کارتونو لرونکي وو.
په دغو کډوالو کې داسې ډېر کسان وو، چې همدلته زېږېدلي او لوی شوي وو او هېڅکله یې افغانستان نهوو لیدلی.
د یادونې وړ ده، چې په افغانستان کې د جمهوري نظام له رانسکورېدو وروسته له نورو هېوادونو په ځانګړې توګه له پاکستان او ایران څخه نږدې ۵ میلیونه افغان کډوال د کوربه هېوادونو له لوري اېستل شوي دي. هغوی په افغانستان کې هم د سرپناه او کاروبار د نشتوالي تر څنګ له ګڼو ستونزو سره مخ دي.
د پاکستان د بهرنیو چارو وزیر اسحاق ډار وايی، ۱۱ تنه پاکستاني وګړي چې د سومالیا د «پونټلنډ» ساحل ته نږدې سمندري غلو برمته کړي وو، تر ۲۴ ورځو بند وروسته نن خوشې شول. خوشې شوي پاکستانیان د ټایلنډ پلازمېنې ته رسېدلي او ډېر ژر به اسلاماباد ته ولېږدول شي.
د پاکستان د بهرنیو چارو وزارت په خپره شوې خبرپاڼه کې راغلي، چې ټول خوشې شوي وګړي روغ رمټ دي او د سنګاپور له لارې بنکاک ته رسېدلي دي.
د پاکستان د بهرنیو چارو وزیر اسحاق ډار ټینګار کړی چې د بهر مېشتو پاکستانیانو خوندیتوب او هوساینه، په ځانګړي ډول د کړکېچ پر مهال، د حکومت له مهمو لومړیتوبونو څخه ګڼل کېږي.
اسلاماباد د دغو کسانو په راخوشې کولو کې د سنګاپور، امریکا، ایران او تایلنډ له حکومتونو څخه د رغندې همغږۍ او ډیپلوماټیکې همکارۍ له امله مننه وکړه.
د بلوچستان په بېلابېلو سیمو کې د وسلهوالو پېښو له امله ۸ کسان وژل شوي او ۸ نور ټپيان دي. ځایي پولیس وايي، یوازې د پنجګور ولسوالۍ د ګوارګو سیمې اړوند پر یوه موټر د ناپېژاندو وسلهوالو په ډزو کې درې کسه وژل شوي او پنځه نور ټپیان دي.
بلخوا د حب ښار د ګلشن لسبېلې په سیمه کې د کورنۍ شخړې له امله په یوه کور کې ډزې شوې، چې له امله یې یوه مور او د هغې زوی وژل شوي او یوه ښځه ټپي شوې ده. په همدې حال کې د کچلاک بازار د وزیراباد سړک پر غاړه په یوې سوداګریزې ودانۍ کې ناپېژاندو وسلهوالو دوه کارګر وروڼه وژلي دي.
د کچلاک پولیس وایي، وژل شوي کسان محمد حسن او محمد عاطف نومېدل چې د خیبر پښتونخوا د مردان اوسېدونکي وو. وسلهوالو پر دواړو وروڼو ډزې کړې او خپله له سیمې تښتېدلي دي.
بلخوا د کچي ولسوالۍ د بولان په سیند کې یو ځوان د لامبو پرمهال ډوب شوی. همداراز د چاغي ولسوالۍ په مرکز دالبندین ښار کې هم ناپېژاندو کسانو ډزې کړې، چې له امله یې دوه تنه ټپیان شوي او یو ځوان تښتول شوی دی.
همدارنګه د مستونګ ولسوالۍ د درینګړ په سیمه کې وسلهوالو د پولیسو پر تاڼه برید کړی، ودانۍ یې سوځولې او تاڼه په بشپړه توګه ویجاړه شوې ده.
د امریکا د الوتکو جوړونې لوی شرکت بوینګ ونډې وروسته له هغه شاوخوا ۴ سلنه راولوېدلې چې د امریکا ولسمشر ډونالډ ټرمپ وویل، چین یوازې د ۲۰۰ الوتکو د پېرلو هوکړه کړې ده.
ټرمپ له فاکس نیوز سره په خبرو کې ویلي، چې چین د بوینګ ۲۰۰ الوتکو د اخیستلو پرېکړه کړې، خو دا شمېر د هغو تمو په پرتله ډېر کم دی چې د بازار شنونکو یې اټکل کاوه.
د راپورونو له مخې، د دې احتمالي تړون جزیات لا هم نه دي روښانه، په ځانګړي ډول دا چې کوم ډول الوتکې او په کومه موده کې به سپارل کېږي.
د بوینګ ونډو له دغه اعلان وروسته د ونډو په بازار کې ښکته حرکت وکړ، ځکه چې مخکې داسې اټکلونه موجود وو چې چین ښايي شاوخوا ۵۰۰ الوتکو لوی قرارداد وکړي.
په همدې حال کې، د نړیوالو رسنیو راپورونه ښيي چې د ټرمپ او د چین د ولسمشر شي جین پینګ ترمنځ د لیدنې پر مهال د لوی هوايي تړون په اړه خبرې شوې وې، خو وروستۍ پرېکړه د تمو خلاف کمه اعلان شوې ده.
تحلیل کوونکي وايي د چین او امریکا ترمنځ د سوداګریزو اړیکو دا ډول بدلونونه د هوايي صنعت پر بازار مستقیم اغېز لري او د لویو شرکتونو ونډو باندې منفي فشار راوړي.