په پاکستان کې د يوې تولې سرو زرو په بیه کې د ۱۵۵۰۰ کلدارو په اندازه کمښت راغلی دی
د پاکستان بازارونو کې د یوې تولې سرو زرو په بیه کې ۱۵ زره ۵۰۰ کلدارې کمښت راغلی دی. د پاکستان د سرو زرو ټولنې د معلوماتو لهمخې، د جمعې په ورځ (د غويي ۲۵مه) په ځايي صرافه بازار کې د ۲۴ قیراط سرو زرو په بیه کې ۱۵ زره ۵۰۰ روپۍ کمښت راغلی او ۴ لکه ۷۶ زره ۸۶۲ روپیو ته رسېدلې ده.
د ځايي رسنيو د راپور لهمخې، همدارنګه د ۱۰ ګرامه سرو زرو په بیه کې ۱۳ زره ۲۸۹ کلدارې کمښت راغلی دی، چې له دې وروسته یې نوې بيه ۴ لکه ۸ زره ۸۳۲ کلدارې ټاکل شوې ده.
ويل شوي، په نړیوال مارکيټ کې هم د سرو زرو بیه د ۱۵۵ ډالرو په کمی سره تر فياونس ۴ زره ۵۴۵ ډالرو پورې راښکته شوې ده.
ایسوسیېشن وایي، په ځايي کچه په بیو کې د کمښت اساسي لامل په نړیوال مارکېټ کې د سرو زرو د بیو راټېټېدل دي.
