یوه ښوونکې: طالبانو د ښځینه ښوونکو تنخوا تر نیمایي هم کمه کړې ده
یوې کابل مېشتې ښوونکې افغانستان انټرنشنل ته په یوه لېږلي پیغام کې ویلي، طالبانو د ښځینه ښوونکو تنخوا تر نیمایي هم کمه کړې چې دوی یې له پراخو ستونزو سره مخ کړې دي. هغه چې له ۳۰ کلونو راهیسې په یوه دولتي ښوونځي کې تدریس کوي وایي، تنخوا یې له ۱۵زره افغانیو ۵زره ته راښکته شوې.
نوموړې چې د خپلې کورنۍ یوازینۍ سرپرسته ده وایي، چې په دې تنخوا د کورنۍ ټول لګښتونه نهشي پوره کولی. هغه وایي:« پخوا مو یو څه برابر ژوند لاره؛ خو اوس د تنخوا کمښت مې اقتصادي ستونزې ډېرې کړې دي».
د نوموړې په وینا؛ تر دې وړاندې د لېسې برخې د کیمیا ښوونکې وه، خو د نجونو پر زدهکړو د بندیز له امله اوس د لومړي ټولګي ښوونکې ده. هغه وایي:« د تجربې په ډېرېدو د دې پرځای چې پرمختګ وکړو، موږ ورځ تر بلې شاتګ کوو. واک ته د طالبانو له رسېدو وروسته د ښځو ټولې لاس ته راوړنې په اوبو لاهو شوې».
هغه وایي، شاوخوا لس کاله وړاندې کونډه شوې، ماشومان یې لا واړه دي او د کار کولو لپاره څوک نهلري. د هغې په وینا:« ماته ورته د افغانستان په بېلابېلو برخو کې ګڼې ښځې له ورته ستونزې سره مخ دي. د طالبانو محدودیتونو او د ښځو پر وړاندې د دوی پالیسیو زموږ ژوند له ننګونو سره مخ کړی دی».
هغې زیاته کړې ده:« زه نه پوهېږم په دغه کمې تنخوا لومړی د کور کوم لګښت پوره کړم».
