د فاریاب یو اوسېدونکی: طالبانو د شپې لهخوا د فوټبال لوبې پرمهال څلور ځوانان نیولي دي
د فاریاب یو اوسېدونکي افغانستان انټرنشنل ته په یوې لېږلې ویډیو کې ویلي، په یاد ولایت کې د طالبانو د امربالمعروف مشر د فوټبال او فوټسال لوبغاړو ته خبرداری ورکړی چې د شپې دې لوبې نهکوي. طالبانو له همدې امله ۴ لوبغاړي هم نیولي او بنديان کړي یې دي.
دغه کس په لېږل شوې ویډیو کې وایي، تېره شپه په فاریاب کې د امربالمعروف مشر ۴ ځوانان له دې کبله نیولي او بنديان کړي چې د شپې لهخوا یې د فوټبال لوبه ترسره کوله.
نوموړي زیاته کړې، د ورځې د سختې ګرمۍ له امله د فوټبال تمرینونه او لوبې نهشي کولی او د شپې بیا طالبانو بندیز پرې لګولی او هغه کسان نیسې چې د دوی له فرمان څخه سرغړونه کوي.
هغه ویلي: «د دغه ولایت د امربالمعروف مشر د فوټسال لوبغالي ته ورغلی او ټینګار یې کړی، چې د شپې له ۱۲ بجو ورسته به د فوټبال او فوټسال لوبې نه ترسره کوي».
طالبانو تر دې وړاندې په روژې میاشت کې هم د شپې لهخوا په ګڼو ورزشي لوبو او د روژې په مناسبت پر کېدونکو سیالیو بندیز لګولی و.
