د ایران د جګړې پرمهال؛ د اسراییل د پوځ لوی درستیز متحده عربي اماراتو ته تللی و
د اسراییل کان رسنۍ راپور ورکړی، چې د اسراییل د پوځ لوی درستیز ایال ضمیر د ایران د جګړې پرمهال متحده عربي اماراتو ته سفر کړی و. راپور زیاتوي، چې نوموړي په دغه سفر کې د متحده عربي اماراتو چارواکو په ګډون د دغه هېواد له ولسمشر محمد بن زاید سره هم لیدلي و او خبرې یې کړې وې.
تر دې وړاندې د اسراییل د لومړي وزیر بنیامین نتنیاهو دفتر هم ویلي و، چې نتنیاهو د ایران د جګړې پرمهال متحده عربي اماراتو ته سفر کړی او هلته یې د اماراتو له امیر شیخ محمد بن زاید سره لیدلي، چې دا د دواړو مشرانو ترمنځ لومړنۍ تایید شوې لیدنه بلل کېږي.
یوې باخبره سرچینې ویلي و، نتنیاهو او محمد بن زاید (د مارچ په ۲۶مه) د عمان پولې ته څېرمه د العین په ښار کې لیدلي او خبرې یې څو ساعته دوام کړی دی.
سرچینې زیاته کړې وه، چې د موساد مشر ډیډي بارنیا د ایران جګړې پرمهال لږترلږه دوه ځلې اماراتو ته سفر کړی؛ څو د پوځي اقداماتو همغږي وکړي. د هغه د سفر خبر په لومړي ځل وال سټریټ ژورنال خپور کړی و.
