د لنډي کوتل قومي مشرانو د پاکستان له حکومته غوښتي، چې د لوی اختر لپاره د تورخم له لارې د افغان کډوالو د ستنېدو لړۍ ګړندۍ کړي. دغه مشرانو پرون ځایي امنیتي چارواکو ته د نوم لیکنې د سوکه بهیر او هغو ستونزو په اړه معلومات ورکړل، چې ستنېدونکي افغان کډوال ورسره مخ دي.
دوی وایي، د نوم لیکنې سوکه بهیر او په کډو بار د موټرو اوږدو کتارونو له امله نه یوازې افغان کډوال؛ بلکې ځایي اوسېدونکي هم د ټرافیکي ګڼې ګوڼې له امله شکایت کوي.
دا په داسې حال کې ده، چې په تېرو وروستیو کې له پاکستان نه د افغان کډوالو څپه پراخې شوې ده. د افغانستان انټرنشنل – پښتو لهخوا د راټولو شویو شمېرو له مخې؛ یوازې تېره اوونۍ (د وري له ۱۹مې تر ۲۴مې) ۵زره او ۹۵۶ کډوالې کورنۍ چې ټولټال ۲۹زره او ۷۳۷ کسان کېږي؛ له ایران او پاکستان نه افغانستان ته ستنې شوې دي.
د شمېرو له مخې؛ له یادې ډلې یوازې ۴زره او ۵۸۲ کورنۍ د تورخم له لارې ستنې شوې دي. له بل پلوه ستنېدونکي افغان کډوال هم د نوم لیکنې او اړونده قانوني بهیر له سوکهوالي شکایت کوي. دوی وایي، نه یوازې دا چې دغه بهیر سوکه روان دی؛ بلکې د ستنېدو پرمهال دوی د پاکستاني چارواکو او مامورانو لهخوا له بډې اخیستنې سره هم مخ دي.
