په سند کې د ډبرو سکرو د یوه کان نړېدو له امله څلور کسان مړه او پنځه نور ټپیان شوي دي
د پنجشنبې په ورځ د پاکستان د سند ایالت په ټهټه ولسوالۍ کې د ابراهیم په نوم د ډبرو سکرو یو کان نړېدو له امله لږترلږه څلور کان کېندونکي مړه او پنځه نور ټپیان شوي دي. د مړو شویو کسانو له ډلې دوه تنه یې د سوات اوسېدونکي دي.
د ځایي چارواکو په وینا؛ ټپیان د درملنې لپاره د جهرک، کوټري او حیدراباد روغتونونو ته لېږدول شوي دي. ځایي چارواکو ویلي، چې د ځینو ټپیانو روغتیایي حالت نازک ښودل شوی دی.
