ملګرو ملتونو په سوډان کې د قحطۍ او بشري ناورین په اړه خبرداری ورکړی
د ملګرو ملتونو په مرسته د جګړې د یوه تصویر اخیستونکي ګیلیز کلارک لهخوا د سوډان له ختیځو سیمو خپرې شوې ویډیو کې ښکاري، چې په دغه هېواد کې بشري ناورین تر بل هر وخت پراخ شوی. ملګرو ملتونو ویلي، شاوخوا ۳۳مېلیونه خلک په سوډان کې مرستو ته اړتیا لري او ۱۴سیمې د قحطۍ له ګواښ سره مخ دي.
د ملګرو ملتونو لهخوا په خپور شوي راپور کې راغلي، چې د سوډان ختیځو سیمو ته تګ خورا ستونزمن او خطرناک دی؛ خو ګیلز کلارک د ملګرو ملتونو د بشري چارو همغږۍ دفتر (اوچا) په مرسته هلته تللی او د جګړې اغېزې یې مستند کړې دي.
دغه مستند چې ««د دارفور ژغورل شوي کسان» نومېږي، د سوډان د ډارفور سیمې د ژغورل شویو خلکو دردناک حالت بیانوي. په راپور کې راغلي، چې کلارک د پنځو ملکي وګړو کیسې او انځورونه راټول کړي او د جګړې اغېزې یې پهکې یادې کړې دي.
دغه تصویر اخیستونکي په نړۍوالو غږ کړی، چې د سوډان له انساني کړاو باید سترګې پټې نهکړي؛ ځکه هلته حالت تر تصور هم ډېر کړکېچن دی. ملګرو ملتونو په دغه راپور کې ویلي، یاد راپور په ټولیز ډول نړۍ ته یو څرګند پیغام رسوي چې د سوډان انساني ناورین له پامه ونه غورځول شي او دغه هېواد بېړنۍ مرستې ته اړتیا ده.
تر دې وړاندې ملګرو ملتونو ویلي و، چې تر څلور مېلیونه ډېر کسان د جګړې له امله له سوډان نه تښتېدلي دي. په سوډان کې د پوځ او چټک ملاتړ ځواکونو (RSF) ترمنځ جګړه د ۲۰۲۳کال د اپرېل په ۱۵مه پیل شوه، چې لاهم دوام لري.
