امریکا پولنډ ته د ۴۰۰۰ سرتېرو لېږلو پلان لغوه کړ
پنټاګون په ناڅاپي ډول پولنډ ته د ۴۰۰۰ امریکايي سرتېرو د استولو پلان لغوه کړ. د پنټاګون له یادې پرېکړې سره په اروپا کې د امریکا د نظامي حضور کمولو په اړه نوې پوښتنې راپورته کړې دي. وړاندې هم ټرمپ له جرمني څخه د ۵۰۰۰ سرتېرو د اېستلو اعلان کړی و.
د امریکا د پوځ سرپرست لوی درستیز جنرال کریسټوفر لا نیو د جمعې په ورځ، د استازو جرګې د وسله والو خدماتو کمېټې ته د وینا پر مهال دغه پرېکړه تایید کړه، خو د علت په اړه یې یوازې دومره وویل چې په اوسني وضعیت کې د دغې لوا نه لېږل غوره ګام و.
په ورته مهال د ډیموکرات ګوند استازو دا پرېکړه د اروپا د امنیت په اړه د ټرمپ د ژمنو په وړاندې یو «بد پیغام» وباله.
دا پرېکړې تر ډېره د ایران د جګړې پر سر د ټرمپ او اروپايي متحدینو ترمنځ د ژورو اختلافونو زیږنده بلل کېږي. ټرمپ له دې امله په غوسه دی چې اروپايي هېوادونو د ایران په جګړه کې د امریکا ملتیا نه ده کړې. نوموړي په ځانګړي ډول د جرمني له لومړي وزیر فریدرېښ مېرڅ سره پر دې موضوع لفظي شخړه هم کړې وه.
بل لوري ته، د پولنډ لومړي وزیر ډونالډ ټوسک ویلي، چې له واشنګټن څخه یې ډاډ ترلاسه کړی چې دا پرېکړه یوازې «لوجستیکي بڼه» لري او د پولنډ پر امنیت او دفاعي وړتیا به منفي اغېزه ونه کړي.
دا په داسې حال کې ده چې د تېر کال په پای کې په اروپا کې د امریکايي سرتېرو شمېر ۸۵ زره تنه و، خو ټرمپ په دوامداره توګه له ناټو غوښتي چې د اروپا په دفاع کې لویه ونډه واخلي او اروپایي هېوادونه دې خپل نظامي لګښتونه زیات کړي.
