تهران ټایمز وايي امریکا د ایران ۱۴ مادهییز وړاندیز رد کړ
د ایران تهران ټایمز خبري اژانس راپور ورکړی، چې امریکا د جګړې د پای ته رسولو په موخه د ایراني چارواکو ۱۴ مادهییزه لیکلې طرحه رد کړې ده. واشنګټن د ایران د وړاندیزونو له منلو په انکار سره، یو ځل بیا پر خپلو پخوانیو شرایطو ټینګار کړی دی.
د یاد اژانس د راپور له مخې، امریکا د ایران د وړاندیزونو پر ځای د خپلو شرطونو پر پلي کېدو ټینګار کوي. واشنګټن په ځانګړي ډول د اټومي پروګرام په برخه کې د تهران نوې طرحه د منلو وړ نه ده بللې او خپل پخوانی سختدریځه موقف یې تکرار کړی دی.
د امریکا او ایران ترمنځ اړیکې له څو لسیزو راهیسې ترینګلې دي، خو په وروستیو کلونو کې تر ټولو جدي اختلاف د تهران د اټومي پروګرام پر سر رامنځته شوی دی.
واشنګټن او لوېدیځ هېوادونه ادعا کوي چې ایران د اټومي وسلو د ترلاسه کولو هڅه کوي، خو تهران بیا ټینګار کوي چې اټومي پروګرام یې یوازې سولهییز او د انرژۍ د تولید لپاره دی.
