د افغان ښځو متحده لوبډله په نیوزیلنډ کې دوه دوستانه سیالۍ کوي
د افغان ښځو متحده فوټبال لوبډله د جون میاشتې په لومړۍ اوونۍ کې د نیوزیلنډ په اوکلینډ ښار کې د کوک ټاپوګانو پر وړاندې دوه دوستانه سیالۍ ترسره کړي.
دغه لوبې به د جون په څلورمه او اتمه نېټه ترسره شي او دا د نړیوال فوټبال فدراسیون تر ملاتړ لاندې د لوبډلې لومړنی تمریني کمپ بلل کېږي، وروسته له هغې چې د یاد فدراسیون شورا افغان ښځو ته په راتلونکو رسمي سیالیو کې د ګډون لاره هواره کړه.
د لوبډلې روزونکې پاولین هیمل ویلي، هر ځل چې لوبغاړې میدان ته ښکته کېږي، ارزښتناکه تجربه ترلاسه کوي او دا سیالۍ به د نړیوالو لوبو له فشار او چټکتیا سره د بلدتیا په برخه کې مرسته وکړي.
د لوبډلې دروازه ساتونکې مونتها مصلح هم وایي، موخه یې دا ده چې تر بل هر وخت پیاوړې لوبډله جوړه کړي او د ماشومتوب خوب ته نږدې شي.
افغان ښځینه لوبغاړو تېر کال په مراکش کې د نړیوالو دوستانه سیالیو پر مهال خپله لومړنۍ تاریخي بریا هم خپله کړې وه او د لیبیا لوبډلې ته یې اووه ـ صفر ماتې ورکړې وه.
اوس ټاکل شوې چې دغه لړۍ په نیوزیلنډ کې دوام ومومي. د لوبډلې په نوي نوملړ کې ۲۳ لوبغاړې شاملې دي چې ډېری یې د تېر پړاو غړې پاتې شوي او څو نوې څېرې هم ورزیاتې شوې دي.
