په ټایلنډ کې د بس او رېل ګاډي د ټکر له امله ۸ کسان مړه شوي او ۳۲ نور ټپیان دي
د ټایلنډ د ټرانسپورټ وزارت مرستیال ویلي، چې په بنکاک کې د یوه باروړونکي رېل ګاډي او مساپر وړونکي بس د ټګر له امله لږ تر لږه ۸ کسان مړه شوي او ۳۲ نور ټپیان دي.
د ټایلنډ د ټرانسپورټ وزارت مرستیال سیریپونګ انګاک ساکولکیات خبریالانو ته ویلي، چې یاده پېښه نن د شنبې په ورځ، په بنکاک کې د ریل ګاډي د پټلۍ د تېریدو په ځای کې شوې او له ټکر سره سم په بس کې اور لګېدلی چې له امله یې شاوخوا نورو وسایطو ته هم زیان رسېدلی دی.
د پېښې یوه عینې شاهد رویټرز ته ویلي:« بس په سره اشاره کې بند پاتې و او د حرکت لاره یې نه لرله. نور موټر هم بند وو او مخکې نه شوای تللی. اور سمدستې ولګېد، که دا یوه عادي کاري ورځ وای، ښايي زیان به یې تر دې ډېر زیات و».
د ژغورنې دلو ویليو د اوبو د نلونو په واسطه یې اور مړ کړی او له ویجاړ شوي بس څخه یې ټپیان را اېستلي او روغتون ته لېږدولي
