ګوهر خان: کشمیر کې د تحريک انصاف د نوماندانو د نوم لیکنې ردول تبعيضي چلند دی
د پاکستان تحریک انصاف ګوند مشر ګوهر خان د پاکستان تر ولکې لاندې کشمير کې د ټاکنو کمېسيون د تحریک انصاف ګوند د راجسترېدو ردول توپيري چلند بللی دی. په کشمیر کې د ټاکنو کمېسیون د دغې چارې لامل د یاد ګوند په مالي چارو کې بېنظمي بللې ده.
ګوهر خان د شنبې په ورځ (د غويي ۲۶مه) په خپله اېکسپاڼه وويل، د ۲۰۲۳م کال په نومبر مياشت کې په کشمیر کې تحریک انصاف ګوند د راجسترېدو لپاره ټول اسناد د ټاکنو کمېسیون ته سپارلي وو، د پيپلز پارټۍ، مسلم ليګ ن، جمعیت علمای اسلام او جماعت اسلامي راجستر شول، خو نن نږدې ۳۰ میاشتې وروسته، د تحریک انصاف ګوند راجسترېدل رد شول.
د پاکستاني رسنيو د راپور لهمخې، د کشمير د ټاکنو کمېسيون د دغې چارې لامل، د تحریک انصاف ګوند په مالي چارو او حسابونو کې بېنظمي بللې ده.
ګوهر خان خبرداری ورکړی، چې د جولای په مياشت کې د کشمير له ټاکنو څخه د يوه «لوی» سياسي ګوند لرې کول، «دا بهير به غيرقانوني او غیر ډيموکراټيک کړي».
هغه زياته کړې، «رای ورکول د خلکو حق دی او کله چې د خلکو غږ نه اورېدل کیږي، ولسواکي خیالي تصور ګرځي».
