د پاکستان د کورنیو چارو وزیر له ایراني چارواکو سره د خبرو لپاره تهران ته ورسېد
د پاکستان د کورنیو چارو وزیر محسن نقوي د سیمهييزو کړکېچونو د کمولو لپاره د اسلاماباد د هڅو په لړ کې د دوه ورځني سفر په ترڅ کې تهران ته رسېدلی دی. ایراني رسنیو ویلي، نقوي د خپل ایراني سیال سره د دوه اړخیزو اړیکو د پیاوړتیا او د سولې د خبرو اترو د بیا پیل په اړه خبرې اترې کړې دي.
د پاکستان د کورنیو چارو وزیر محسن نقوي د شنبې په ورځ، تهران ته ورسېد او په هوايي ډګر کې یې د ایران د کورنیو چارو وزیر اسکندر مومني لخوا هرکلی وشو.
د ایران رسنیو راپور ورکړ، چې دواړوسیالانو د تلپاتې سولې او وروستیو سیمه ییزو پرمختګونو په اړه خبرې کړې دي. د یادې لیدني پرمهال د ایران د کورنیو چارو وزیر اسکندر مومني د تهران او واشنګټن ترمنځ د منځګړیتوب لپاره د پاکستاني چارواکو «ریښتني» هڅې ستایلې دي او په سیمه کې یې د سولې او ثبات د ودې لپاره د پاکستان رول مهم وباللی دی.
د راپورونو له مخې، د پاکستان د کورنیو چارو وزیر محسن نقوي به د خپل دوه ورځني سفر پرمهال په تهران کې د ایران له یو شمیر نورو چارواکو سره هم وګوري.
