د بلوچستان اسمبلۍ کې د ناامنۍ پر زیاتېدو اندېښنې؛ وزیران او د اسمبلۍ غړي هم خوندي نه دي
د بلوچستان ایالتي اسمبلۍ غړو په کوټه کې د اسمبلۍ غونډې پر مهال د ایالت د خراب امنیتي وضعیت په اړه جدي اندېښنې څرګندې کړي او ویلي یې دي چې وزیران او د اسمبلۍ غړي هم د باجاخیستنې او بریدونو له ګواښونو سره مخ دي.
د پاکستان پیپلز ګوند د بلوچستان ایالتي اسمبلۍ پارلماني مشر میر صادق عمراني وویل، په بلوچستان کې هره ورځ د ناامنۍ پېښې کېږي، لویې لارې خوندي نه دي او خلک خپلو سیمو ته په ډاډه زړه سفر نهشي کولای.
هغه زیاته کړه چې که خلکو ته امنیت برابر نهشي، نو د اسمبلۍ ناستې هېڅ مانا نه لري.
د بلوچستان کورنیو چارو وزیر ضیا لانګو هم ومنله چې د قانون او نظم وضعیت د اندېښنې وړ دی. نوموړي وویل، د اسمبلۍ غړو او وزیرانو لپاره امنیتي ساتونکي ټاکل شوي او له سیاسي ګوندونو یې وغوښتل چې وسلهوالې ډلې په ښکاره وغندي.
په دې اړه د بلوچستان اسمبلۍ سپیکر عبدالخالق اڅکزي وویل، حکومت باید د امنیت د ښه کولو لپاره عملي ګامونه پورته کړي
