د ختیځ انګلستان پوهنتون په نوې څېړنه کې موندلې، هغه افغان ځوانان چې له کورنیو پرته برېتانیا ته تللي، له ژور رواني کړاو، یوازېتوب او خپګان سره مخ دي. دا ځوانان چې د طالبانو له واکمنېدو وروسته برېتانیا ته کډوال شوي، لا هم له تېرو ترخو یادونو او رواني فشارونو څخه سخت ځورېږي.
څېړونکو له ۱۲ هغو افغان ځوانانو سره مرکې کړي، چې د ۱۴ او ۲۱ کلونو ترمنځ برېتانیا ته رسېدلي او اوس د شاوخوا شلو کلونو په عمر کې دي. په څېړنه کې د عبدالله په نوم یوه ګډونوال ویلي، چې په افغانستان کې د خپل خپلوانو وژل کېدو سخت اندېښمن کړی او د شپې لهخوا خوب نهشي کولی.
یوه بل ځوان بیا ویلي، چې د هغه رواني فشارونه او دردونه اوس په فزیکي ناروغیو بدل شوي دي. دغه ځوانان د پښتنو، تاجکو او هزارهګانو په ګډون له بېلابېلو قومونو څخه دي.
د څېړنې مشره او روانپوهه ربیکا لېن او کلینیکي استاد ډاکتر کیني چیو وایي، هغه ماشومان چې له میندو او پلرونو پرته برېتانیا ته رسېدلي، د نورو کډوالو پر تله ډېر له رواني فشار او خپګان سره مخ دي.
د دوی په وینا، دا ځوانان د فزیکي دردونو، رواني ستونزو او ټولنیزو اړیکو په برخو کې له ننګونو سره مخ دي او له خلکو سره په اړیکو جوړولو کې ستونزې لري.
کارپوهان زیاتوي، چې په افغاني ټولنه کې د نارینهوو لهخوا د خپلو احساساتو نه څرګندول د دوی رواني ستونزې لا پسې ډېرې کړې دي.
د څېړنې لهمخې، ډېری دغو ځوانانو د خپلو اندېښنو د کمولو لپاره کرېکټ، لمونځ کولو او له ملګرو سره خبرو ته مخه کړې ده، خو یو شمېر کمو کسانو بیا ځان ته د زیان رسولو او یا هم د الکولو کارولو هڅه کړې ده.
