ټرمپ او د سویلي کوریا ولسمشر د امریکا او چین د سرمشریزې پر پایلو غږېدلي
د رویټرز د راپور له مخې، د سویلي کوریا ولسمشر لي جې میونګ له خپل امریکایې سیال ډونالډ ټرمپ سره د یکشنبې په ورځ ټلیفوني خبرې کړې او د امریکا او چین ترمنځ د وروستۍ غونډې پر پایلو غږیدلي دي.
د راپور له مخې د سویلي کوریا د ولسمشرۍ ماڼۍ ویلي، ټرمپ د چین له ولسمشر شي جین پینګ سره د خپلې لیدنې د پایلو په اړه لي جې میونګ ته معلومات ورکړي، چې د امریکا او چین اړیکې، اقتصادي او سوداګریز تړونونه، د کوریا ټاپووزمې وضعیت او د منځني ختیځ حالات پکې شامل وو.
د راپور له مخې، د سویلي کوریا ولسمشر ویلي چې د ټرمپ او شي جین پینګ خبرې د کوریا ټاپووزمې د مسالو په تړاو رغنده وې.
سپینې ماڼۍ ته نږدې سرچینو ویلي، ټرمپ د سویلي کوریا ولسمشر ته ډاډ ورکړی چې واشنګټن به له سیول سره په نږدې همکارۍ د کوریا ټاپووزمه کې د سولې او ثبات لپاره خپلو هڅو ته دوام ورکړي.
بل لور ته، لي جې میونګ ویلي چې د امریکا او چین ترمنځ د اړیکو باثباته مدیریت به د سیمې او نړۍ د سولې او سوکالۍ لپاره مهم رول ولوبوي.
