محمود خان اڅکزي له عمران خان سره د لیدنې لپاره حکومت ته درې ورځنی ضرب الاجل وټاکه
د پاکستان د اپوزیسیون مشر او د تحریک تحفظ ایین پاکستان د اتحاد مشر محمود خان اڅکزی وايي، د پاکستان حکومت دې له عمران خان سره د دوی د لیدنې نېټه په ډاګه کړي. نوموړي د عمران خان د درملنې په اړه اندېښنه ښودلې او ویلي یې دي چې باید د کورنۍ په خوښه یې درملنه وشي.
د پاکستان په پارلمان کې د اپوزیسیون مشر محمود خان اڅکزي نن یکشنبه، د غويي پر ۲۷مه په خپل اېکس کې لیکلي، چې د پاکستان حکومت ته یې د عمران خان د وضعیت په تړاو درې ورځنی ضرب الاجل ټاکلی دی.
نوموړي ویلي چې حکومت باید د عمران خان د برخلیک او درملنې په اړه د دوی غوښتنو ته ژر تر ژره روښانه ځواب ووایي.
اڅکزي له حکومت څخه غوښتي چې په روښانه توګه اعلان وکړي چې له عمران خان سره به د لیدنې زمینه کله برابرېږي. د دې تر څنګ، هغه ټینګار کړی، چې د عمران خان درملنه باید د کورنۍ او د هغه په خپله خوښه په یوه روغتون کې وشي.
د پاکستان د اپوزیسیون مشر د دغه هېواد حکومت ته خبرداری ورکړی، چې دوی ته باید د درېیو ورځو په ترڅ کې د دې غوښتنو ځواب ورکړل شي.
هغه ګواښ کړی چې که چېرې حکومت د دوی غوښتنو ته پام ونه کړي او ځواب ورنه کړي، نو د دوشنبې له ورځې به اسمبلۍ خپل فعالیت ونه شي کړای او د هر ډول پایلو مسوولیت به یې د حکومت پر غاړه وي.
محمود خان اڅکزي دا څرګندونې د اپوزیسیون د مشر او د «تحریک تحفظ ایین پاکستان» په نوم د اپوزیسیون د تر ټولو لوی سیاسي ایتلاف د مشر په توګه کړې دي. نوموړي په خپلو خبرو کې ویلي چې دا غوښتنې په نرمو ټکو کوي، خو حکومت باید ورته جدي پاملرنه وکړي.
