د پاکستان دبلوچستان ایالتپه چاغي او پنجګور ولسوالیو کې وسلهوالو د امنیتي تاسیساتو پر ضد بریدونه کړي، چې له امله یې امنیتي وضعیت یو ځل بیا ترینګلی شوی دی. په دغه بریدونو کې د دوه کسانو د ټپي کېدو خبر ورکړل شوی.
د راپورونو له مخې، د چاغي ولسوالۍ په مرکز دالبندین کې وسلهوالو کسانو د ښار په بېلابېلو سیمو کې لارې تړلې او وروسته یې د ښار پر مرکزي پولیس تاڼه برید کړی دی.
سرچینې وایي، بریدګرو تاڼې ته اور اچولی او د ګډوډۍ پر مهال یو شمېر بندیان هم له زندانه تښتېدلي دي.
پولیسو ویلي، له برید وروسته امنیتي ځواکونه سیمې ته رسېدلي او له وسلهوالو سره یې نښته کړې، چې وروسته بریدګر له سیمې تښتېدلي دي.
د پولیسو په وینا، وضعیت اوس تر کنټرول لاندې دی، خو د بریدګرو د نیولو لپاره د لټون عملیات دوام لري.
د روغتون سرچینو د ډزو له امله د دوو کسانو د ټپي کېدو خبر ورکړی دی.
بلخوا، د پنجګور ولسوالۍ په یوه بله پېښه کې هم وسلهوالو کسانو د ګمرک پر یوې پوستې برید کړی او یو موټر یې سوځولی دی.
امنیتي چارواکي وایي، ځواکونه سیمې ته رسېدلي او د برید د څرنګوالي او بریدګرو د هویت په اړه پلټنې روانې دي.
په بلوچستان کې دا تازه بریدونه په داسې حال کې کېږي چې په وروستیو اوونیو کې د امنیتي ځواکونو، دولتي تاسیساتو او ترانسپورټي لارو پر ضد د وسلهوالو بریدونو پېښې زیاتې شوې دي.
