رویټرز: پاکستان سعودي عربستان ته ۸ زره پوځیان لېږلي دي
رویټرز خبري اژانس د سرچینو له قوله راپور ورکړی، چې پاکستان له عربستان سره د خپل دفاعي تړون په اډانه کې دغه هېواد ته ۸ زره پوځیان، جنګي الوتکې او د هوايي دفاع سیسټمونه لېږلي دي. رویټرز ویلي، دا ځواکونه بشپړ عملیاتي توان لري او موخه یې پر عربستان د احتمالي بریدو مخنیوی او دفاع ده.
د رویټرز د راپور لهمخې، د پاکستان دغه بېسارې پوځي اقدام په داسې حال کې کېږي، چې اسلاماباد دا مهال د تهران او واشنګټن ترمنځ د منځګړیتوب اصلي رول هم پر غاړه لري.
پاکستان او سعودي عربستان د تېر کال د وږي په میاشت کې په ریاض کې د دوه اړخیز ستراتیژیک دفاعي تړون لاسلیک کړی و، چې د دغه تړون له مخې پر یوه هېواد هر ډول برید، پر بل هېواد برید ګڼل کېږي.
دا اقدامات وروسته له هغې کېږي چې پر ایران د اسراییل او امریکا له بریدونو وروسته، ایران په سیمه کې پر ځینو هېوادونو او په ځانګړې توګه پر سعودي عربستان بریدونه وکړل. پاکستان تر دې وړاندې پر سعودي عربستان د ایران د حکومت دغه بریدونه په کلکه غندلي وو.
