ټرمپ وايي که ایران په بشپړ ډول تسلیم هم شي امریکايي رسنۍ به یې د ایران بریا وبولي
د امریکا ولسمشر ډونالډ ټرمپ پر امریکايي رسنیو په نیوکه کولو سره ویلي، چې که د ایران سمندري او هوايي ځواکونه په بشپړ ډول له منځه هم ولاړ شي او مشران یې د تسلیمۍ اسناد لاسلیک کړي، بیا به هم رسنۍ دغه حالت د ایران بریا وبولي.
ډونالډ ټرمپ پر خپلې ټروتسوشل ټولنیزې شبکې لیکلي:«که د ایران سمندري او هوايي ځواک په بشپړ ډول له منځه ولاړ شي، مشران یې د تسلیمۍ اسناد لاسلیک کړي او ټول ایراني پوځیان د تسلیمۍ نارې ووهي، بیا به هم «نیویارک ټایمز»، «وال سټریټ ژورنال» او «سياېناېن» دا پېښه د ایران د یوې سترې بریا په توګه راپور کړي».
ټرمپ پر رسنیو د تندو څرګندونو تر څنګ پر ډیموکراټانو هم سختې نیوکې کړې او ویلي یې دي چې دوی «خپله لاره ورکه کړې» او «په بشپړه توګه لېوني شوي دي».
