د خېبر پښتونخوا د باړې سیمې نجونې د لوړو زدهکړو له ناورین سره مخ دي
د خیبر پښتونخوا د خيبر ولسوالۍ اړوند د باړې سيمې تر ۶۰۰زره زیات اوسېدونکي یوازې یو دولتي پوهنتون ته لاسرسی لري. دوی وایي، د بنسټیزو اسانتیاوو، لوړو زدهکړو پروګرامونو، ټرانسپورټ او امنیت له سخت کمښت سره مخ دي چې له امله یې ګڼې زدهکوونکې خپلې زدهکړې نیمګړې پرېږدي.
د یادې سیمې زدهکوونکې، د دوی کورنیو او سیمهییزو مشرانو د خیبر پښتونخوا حکومت او د لوړو زدهکړو له ادارې غوښتنه کړې، چې ژر تر ژره دې د لوړو زدهکړو څلور کلن پروګرامونه پیل، عصري لابراتوارونه جوړ، رسمي ټرانسپورټ برابر او دایمي استادان وګماري؛ څو د سیمې نجونې له لوړو زدهکړو بېبرخې نهشي.
نجما عبدالله د باړې په دولتي پوهنتون کې د نجونو برخې د اردو ژبې د څانګې زدهکوونکې ده، هغې د پاکستان اېکسپریس ټریبیون ورځپاڼې ته ویلي، د ترانسپورت نشتوالي هغه دې ته اړ اېستې چې زدهکړو ته د رسېدو لپاره نږدې د خپلې انا په کور کې ژوند وکړي؛ ځکه چې کور یې له پوهنتون نه خورا لرې دی.
هغې وویل: «د باړې د نجونو په استعداد کې هېڅ کمی نهشته؛ خو بېوزلۍ، ټرانسپورټي ستونزو او د لوړو زدهکړو د اسانتیاوو نشتوالي ګڼې زدهکوونکې دې ته اړ باسي، چې خپلې زدهکړې نیمګړې پرېږدي».
نجما غوښتنه وکړه، چې حکومت دې د زدهکوونکو لپاره بسونه برابر کړي؛ ځکه ګڼې نجونې اوږده واټنونه په پښو وهي، چې دا نه یوازې ستړی کوونکی؛ بلکې خوندی هم نهدی. یوشمېر نورو زدهکوونکو هم د ورته ستونزو د یادونې تر څنګ د لوبو د میدان نشتوالی هم د زدهکوونکو لپاره یوه لویه ستونزه یاده کړې.
دغه زدهکوونکو د کمپیوټر ساینس په برخه کې د اسانتیاوو د رامنځته کولو غوښتنه وکړه. دوی ویلي: «د زدهکوونکو لپاره د تګراتګ اسانتیا نهشته او د سیمې د عمومي امنیتي وضعیت له امله زدهکوونکې او د هغوی کورنۍ ځانونه خوندي نه احساسوي».
د پوهنتون اداري چارواکو بیا ویلي، چې د لوړو زدهکړو پروګرامونو د پیل اصلي خنډ د لابراتوارونو او اړینو اسانتیاوو نشتوالی دی. د دوی په خبره، اوسني لابراتوارونه د لوړو زدهکړو د یوې پروژې له لارې برابر شوي؛ خو د لوړو زدهکړو بشپړ پروګرامونه د کمپیوټر ساینس، بیولوژۍ، کیمیا او نورو مضامینو لپاره ځانګړو او عصري لابراتوارونو ته اړتیا لري.
