د ملګرو ملتونو د ماشومانو ملاتړ صندوق (یونیسف) په خپل یوه تازه پیغام کې ویلي چې په سختو او بحراني شرایطو کې ښوونځی د ماشومانو لپاره یوازې د زده کړې ځای نه دی، بلکې د ثبات، خوندیتوب او رواني هوساینې تر ټولو مهمه سرچینه هم ګڼل کېږي.
یونیسف ټینګار کړی چې د ښوونځي بکسې یا کڅوړې، کتابچې، قلمونه او پنسلونه د هغو مهمو درسي وسایلو له ډلې دي چې ماشومانو ته د زده کړې اسانتیاوې برابروي او هغوی ښوونځیو ته د تګ لپاره هڅوي.
د یاد بنسټ په وینا، نړیوال بانک، د اسیا پرمختیایي بانک او د زده کړې لپاره د نړیوال مشارکت په مالي او تخنیکي همکارۍ سره په ګډه کار کوي، څو دغه درسي توکي او تعلیمي تجهیزات د افغانستان بېلابېلو سیمو ته ورسوي او ماشومانو ته یې برابر کړي.
دا په داسې حال کې ده چې د افغانستان په ګڼو سیمو کې ماشومان، په ځانګړي ډول زده کوونکي، د درسي توکو له جدي کمښت سره مخ دي. د نړیوالو بنسټونو دا همکاري کولای شي په اوسنیو حساسو شرایطو کې د افغان ماشومانو له ښوونیز بهیر سره مهمه مرسته وکړي او د زده کړو دوام ته زمینه برابره کړي.
