د امریکا ولسمشر ډونالډ ټرمپ خبرداری ورکړی، چې د ایران حکومت په دې ښه پوهېږي چې «په نږدې راتلونکې کې به څه پېښ شي» او ویلي یې دي چې له تهران سره په روانو خبرو کې هېڅ ډول امتیاز ورکولو ته چمتو نه دی.
ټرمپ له نیویارک پوسټ سره په یوې لنډې مرکه کې ویلي، د ایران د وروستي ځواب تر ترلاسه کولو وروسته به د تهران غوښتنو ته هېڅ ډول نرمښت ونه ښيي. هغه وویل: «هیڅ ډول امتیاز نه منم.»
نوموړي زیاته کړه: «زه تاسو ته ویلی شم چې هغوی تر بل هر وخت ډېر غواړي یوې هوکړې ته ورسېږي، ځکه پوهېږي چې ډېر ژر به څه پېښ شي.»
ټرمپ د هغې پوښتنې په ځواب کې چې ګواکې ایران د ۲۰کلونو لپاره د یورانیمو د غنيکولو د درولو لپاره چمتووالی ښودلی، وویل: «دا مهال هېڅ څه نه منم.»
هغه د موضوع د جزییاتو له شریکولو ډډه وکړه او ویې ویل: «په رښتیا اوس د دې په اړه خبرې نه شم کولای، ډېر څه روان دي.»
ټرمپ همداراز ټینګار وکړ چې له تهران څخه «نه غوسه او نه هم خپه» دی، خو زیاته یې کړه چې د ایران حکومت ښه پوهېږي چې امریکا لا هم د لا ډېر فشار او زیان رسولو وړتیا لري.
د ټرمپ وروستۍ څرګندونې داسې مهال مطرح کېږي چې د واشنګټن او تهران ترمنځ د اړیکو او احتمالي مذاکراتو په اړه بحثونه لا هم د نړیوالو پام ځانته اړولی دی.
