د پښتون ژغورنې غورځنګ غړی فرید اپریدی له پېښور څخه «بېدرکه» شوی دی
د پښتون ژغورنې غورځنګ (پي ټي اېم) مخکښ غړي ذکیم خان وزیر ادعا کړې چې د دغه غورځنګ فعال غړی فرید اپریدی د پاکستان د استخباراتي ادارو له لوري په پېښور کې نیول شوی او نامعلوم ځای ته وړل شوی دی.
د پښتون ژغورنې غورځنګ مخکښ غړي ذکیم خان وزیر په یوه خپاره کړي پیغام کې ویلي چې د پي ټي اېم فعال فرید اپریدی د چهارشنبې په ماښام هغه مهال په پېښور کې د استخباراتي ادارو له لوري ونیول شو، چې خپل کور ته روان و.
ذکیم خان وزیر په ایکس کې لیکلي: «نن ماښام په پېښور کې زموږ تکړه ملګری فرید اپریدی په داسې حال کې د استخباراتي ادارو له لوري وړل شوی چې هغه خپل کور ته روان و.»
هغه په خیبر پښتونخوا کې روان وضعیت «بشپړه پوځي زورواکي» بللې او ادعا یې کړې چې پولیس او ایالتي حکومت هېڅ واک نه لري.
نوموړي زیاته کړې: «د پېښور غوندې ښار څخه زموږ ملګري هره ورځ استخباراتي ادارې له درکه کوي. اووه میاشتې وشوې چې خنیف او نورالله هم ورک دي، د پېښور پوهنتون محصلین هم په پوځي زندانونو کې ساتل شوي وو، او له دې مخکې بلال اورکزی هم د میاشتو لپاره له درکه کړل شوی و.»
ذکیم خان وزیر د بشري حقونو له بنسټونو غوښتي چې دغې موضوع ته جدي پاملرنه وکړي.
تر اوسه د پاکستان حکومت، پوځ یا استخباراتي ادارو د فرین اپریدي د لادرکه کولو په اړه رسمي غبرګون نه دی ښودلی.
