د منځنۍ اسیا اتلولۍ؛ افغانستان د قرغیزستان پر وړاندې بېګوله مساوي شو
د افغانستان د ۲۰کلنو کمعمره فوټبال ملي لوبډلې د ۲۰۲۶کال د منځنۍ اسیا د اتلولۍ سیالیو په لړ کې د قرغیزستان پر وړاندې په خپلې وروستۍ لوبه کې مساوي پایله ترلاسه کړه.
دغه لوبه پرون غرمه د دوشنبه په ښار کې ترسره شوه او دواړو لوبډلو د صفر ـ صفر پایلې سره لوبه پای ته ورسوله.
دا د افغانستان د ۲۰کلنو ملي لوبډلې لپاره په دغو سیالیو کې وروستۍ لوبه وه. افغان لوبډله تر دې وړاندې په خپلو درې پرلهپسې سیالیو کې له ماتې سره مخ شوې وه.
د افغان لوبډلې مخکنۍ لوبې تاجکستان، ازبکستان او ترکمنستان لوبډلو پر وړاندې ترسره شوې وې.
د یادونې وړ ده چې دغه سیالۍ د تېرې اوونۍ د یکشنبې په ورځ، د غویي میاشتې په ۲۰مه، په دوشنبه ښار کې د منځنۍ اسیا د بېلابېلو هېوادونو د غوره لوبډلو په ګډون پیل شوې او ټاکل شوې د همدې میاشتې تر ۳۰مې نېټې دوام وکړي.
