د بامیان اوسېدونکی: په دولتي روغتون کې ناروغان د اسانتیاوو له کمښت سره مخ دي
د بامیان ولایت د ورس ولسوالۍ یو اوسېدونکي په دولتي روغتونونو کې د بنسټیزو اسانتیاوو له نشتوالي شکایت کړی. نوموړي ویلي، چې مېرمن یې د بامیان په روغتون کې عملیات شوې؛ خو دی اړ شوی چې د لابراتواري معایناتو او درملو ترلاسه کولو لپاره شخصي لابراتوارونو او درملتونونو ته مراجعه وکړي.
هغه افغانستان انټرنشنل ته په لېږلي پیغام کې شکایت کړی، چې طالبانو ورته له خپلې مېرمنې سره د لیدنې اجازه هم نهده ورکړې. په وروستیو کلونو کې د افغانستان له بېلابېلو ولایتونو څخه په دولتي روغتونونو کې د اسانتیاوو د کمښت ورته شکایتونه خپاره شوي دي.
ناروغان وایي، ډېری دولتي روغتونونه ان د لومړنیو طبي معایناتو او درملو برابرولو وس هم نهلري او ناروغان اړ کېږي چې د درملنې لپاره شخصي مرکزونو ته ولاړ شي. دا په داسې حال کې ده، چې ډېری خلک د اقتصادي ستونزو له امله دولتي روغتونونو ته مراجعه کوي؛ ځکه د شخصي روغتونونو او کلینیکونو لګښتونه د دوی له مالي وسې پورته دي.
بلخوا د ملګرو ملتونو د روغتیا نړۍوال سازمان څه موده وړاندې خبرداری ورکړی و، چې د افغانستان روغتیايي نظام د بودجې د کمښت له امله له جدي ګواښ سره مخ دی.
ویل کېږي، په ټول افغانستان کې سلګونه روغتیايي مرکزونه په ځانګړي ډول هغه بنسټونه چې پر بهرنیو مرستو یې فعالیت کاوه؛ د بودجې د کمښت له امله تړل شوي او یا یې هم خدمتونه محدود شوي دي.
