د طالبانو ریاست الوزرا د دفتر عمومي رییس ملا عبدالواسع د وانګ بن چاینګ په مشرۍ د چین له لوړپوړو پانګهوالو سره په لیدنه کې په افغانستان کې د کاني زېرمو، لویو لارو، د سالنګ تونل او واخان دهلېز د پراختیا او پانګونې په اړه خبرې کړې دي.
د طالبانو تر واک لاندې ارګ نن دوشنبه، د غويي پر ۲۹مه په اېکس کې د یوې خبرپاڼې په خپرولو سره ویلي، چې په یاده لیدنه کې چینایي پانګهوال وانګ بن چاینګ ویلي چې دوی د لوړپوړو ودانیو د جوړولو، لویو لارو، د کانونو د استخراج، د تېلو د تصفیې او د برېښنا بندونو په برخو کې کافي تجربه او پرمختللې ټکنالوژي لري او غواړي د پانګونې له لارې دغه ټکنالوژي افغانستان ته انتقال کړي.
دغه چینايي پانګوال زیاته کړې، چې دوی به له اسیايي هېوادونو سره د افغانستان د صادراتو او سوداګریزو اسانتیاوو د زیاتولو په موخه، په ځانګړې توګه د لویو لارو په برخه کې اساسي پانګونه وکړي.
په ورته مهال د طالبانو د ریاستالوزرا د دفتر رییس ویلي، چې دوی د کانونو ترڅنګ د سالنګ تونل او واخان دهلېز د بیارغونې او جوړولو لپاره کورنیو او بهرنیو پانګوالو ته بشپړه زمینه برابره کړې ده. نوموړي زیاته کړې، چې چینايي پانګهوال د خپلو شخصي ګټو ترڅنګ باید د افغانستان ګټو او د دوی اصولو ته هم پام وکړي او خپلو چارو ته په بشپړ معیاري توګه اوږه ورکړي.
دا څرګندونې او لیدنې په داسې حال کې کېږي، چې له دې وړاندې هم ګڼ شمېر بهرنیو پانګهوالو په بېلابېلو برخو کې د پانګهونې ورته ژمنې کړې وې، خو وروسته دغه ژمنې یوازې د وینا او کاغذ تر حده پاتې شوې دي.
