طالبان: د ننګرهار په زندان کې د «ردالظلم» په نوم والیبال سیالۍ پایته ورسېدې
د ننګرهار د زندان لپاره د طالبانو مسوول سهیل سعید وايي، په دغه زندان کې د «ردالظلم» په نوم د والیبال سیالۍ پایته ورسېدې. «ردالظلم» د پاکستان پر وړاندې د طالبانو د ځوابي عملیاتو نوم دی؛ په داسې حال کې چې پاکستان پر افغانستان خپلو بریدونو ته «غصبللحق» نوم ورکړی دی.
د ننګرهار د زندانونو چارو د سمون رييس سهیل سعید د یکشنبې په ورځ (د غويي ۲۷مه) ویلي: «په ننګرهار مرکزي زندان کې د ردالظلم تر عنوان لاندې د والیبال ټورنمنټ جوړ شو، چې نن یې پایلوبه وه. په دغه ټورنمنټ کې د ۱۰ ولایتونو لوبډلو شرکت لاره او د ټیمونو تعداد ۴۰ ته رسېده».
له دې سره سم، د ننګرهار ولایت لپاره د طالبانو د رسنیو دفتر هم د یکشنبې په ورځ د یوې خبرپاڼې په خپرولو سره پرته له دې چې د «ردالظلم» کلمه یاده کړي ویلي، دغه سیالۍ د ننګرهار مرکزي زندان کې د ۱۰ ولایتونو د لوبډلو او سیمه ییزو کلپونو ترمنځ شاوخوا یوه میاشت مخکې پیل شوې وې.
د خبرپاڼې لهمخې، د دغې سیالۍ پایلوبه د«بډيالۍ» او «کوز کونړ»لوبډلو تر منځ ترسره شوه او بالاخره لوبه ۳ د صفر پر وړاندې پایلې سره د «بډیالۍ» لوبډلې په اتلولۍ پایته ورسېده.
د یادونې وړ ده، چې پاکستان پر افغانستان د بریدونو له پیل سره خپلو دغو بریدونو ته د «غضبللحق» نوم ورکړ او طالبانو یې بیا خپلو ځوابیه بریدونو ته د «ردالظلم» نوم ورکړ.
