سعودي عربستان او متحده عربي اماراتو له ډرون بریدونو خبر ورکړی
د امریکا او ایران د بېپایلو خبرو او د ټرمپ تر خبرداري وروسته متحده عربي اماراتو خبر ورکړی، چې په دغه هېواد کې د ډرون برید له امله په یوې اټومي بټۍ کې اورلګېدنه رامنځته شوې ده. د سعودي عربستان دفاع وزارت هم ویلي، چې د خپل هوایي حریم پر سر یې درې ډرون الوتکې کشف او لهمنځه وړې دي.
دغه پرمختګونه د ټرمپ له لوري د ایران پرضد د نارسمي پیغامونو له زیاتېدو سره هممهاله شوي دي. ټرمپ د یکشنبې په ماسپښین پر خواله رسنیو د ایران اړونده پوسټونو خپرول پیل کړي.
هغه پر «ټروت» خواله رسنۍ هم په لومړي پوسټ کې لیکلي: «د ایران لپاره د ساعت ټکار روان دی، هغوی باید ډېر ژر اقدام وکړي؛ که نه څه به یې په اوبو لاهو شي. وخت ډېر مهم دی».
وروسته له دې ټرمپ د یکشنبې تر پایه د دوو ساعتونو په موده کې د ایران پر ضد د جګړې او د هرمز تنګي د وضعیت په اړه ۹ نور پوسټونه خپاره کړل، چې ټول یې تصویري پیغامونه لرل.
هغه د مصنوعي ځیرکتیا پرمټ جوړ شوي هغه انځورونه هم بیا خپاره کړي، چې پهکې د ایران د بېرغ لرونکو چټکو کښتیو پر لور د برید شېبې ښودل شوې وې او دارنګه یې د ایران د جګړې د مودې پرتلهییز ګراف له نورو امریکايي جګړو سره څو ځله بیا شریک کړی.
