دهرات-کابل پر لویه لار د باروړونکو موټرو چلوونکو افغانستان انټرنشنل ته ویلي چې پر دغې لارې د طالبانو له لوري د وزن کولو تلي (ترازوګان) ډېرې شوي او ورسره بېنظمي هم زیاته شوې ده. دوی وايي، د دې لارې په اوږدو کې د شاوخوا دولسو تلو فعالیت د موټرو تګراتګ له جدي ځنډ سره مخ کړی دی.
د هرات ـ کابل پر لویه لار د لویو باروړونکو موټرو چلوونکو نن دوشنبه، د غويي پر ۲۹مه وویل، چې د ترازوګانو له ډېرښت او د کاري بهیر له ځنډ سره مخ کړی دی.
د دغو چلوونکو په وینا، په ډېری ترازوګانو کې داسې کسان ګومارل شوي چې اړین مسلکي مهارتونه او تجربه نه لري.
دوی زیاتوي چې د مسلکي کسانو د نشتوالي له امله د یوه موټر د تللو او وزن کولو بهیر کله ناکله تر نیم ساعت پورې وخت نیسي.
د موټرچلوونکو په وینا، چې دا ځنډونه د ترافیکي ګڼې ګوڼې او د موټرو د ټکرونو یو مهم لامل ګرځېدلی دی.
یو موټر چلوونکي وویل:« د شپې له خوا موټرونه د ترازوګانو مخې ته تر سهاره په نوبت ولاړ وي او چلوونکي اړ کېږي چې بېخوبه پاتې شي. کله چې دوی سهار خپل سفر ته دوام ورکوي، د بېخوبۍ له امله د ترافیکي پېښو خطر ډېرېږي.»
د باروړونکو موټرو چلوونکو د طالبانو له اړوندو ادارو غوښتنه کړې، چې د ترازوګانو ستونزې دې ژر تر ژره حل کړي.
دوی ټینګار کړی چې په دغو ترازوګانو کې دې د مسلکي کسانو په ګومارلو سره د موټرو د تګ راتګ بهیر اسانه کړل شي.
د طالبانو د بیاځلي واک ته رسېدو سره دې ډلې په بېلابېلو ادارو کې مسلکي کسان ګواښه کړي او پرځای یې خپل غیرمسلکي کسان په دندو ګمارلي چې له امله اداري بهیر ګډوډ کړی دی.
